गत वर्षभन्दा कर्जा विस्तार वृद्धिदर बढ्यो, लक्ष्य प्राप्तिमा भने अन्योल

अर्थतन्त्र

गृहपृष्ठ
अर्थतन्त्र

गत वर्षभन्दा कर्जा विस्तार वृद्धिदर बढ्यो, लक्ष्य प्राप्तिमा भने अन्योल

क्यापिटल नेपालआइतबार, माघ ६, २०८१

काठमाडौं। बैंक तथा वित्तीय संस्था (लघु वित्त वित्तीय संस्था बाहेक) को कर्जा विस्तार बढेको छ। गत वर्षको ६ महिनाको कर्जा विस्तार वृद्धिदरभन्दा चालू वर्षको छ महिनाको ०.४१ प्रतिशत बिन्दुले बढेको हो।

गत वर्षको ६ महिनामा निजी क्षेत्रमा प्रवाहित कर्जा वृद्धि ४ प्रतिशत रहेको थियो। चालु वर्षको सोही अवधिमा ४.४१ प्रतिशत कर्जा वृद्धि भएको अर्थ मन्त्रालयद्वारा सार्वजनिक आर्थिक सर्वेक्षणको तथ्यांकले देखाएको छ।

यद्यपि सरकारले राखेको आर्थिक वृद्धिको लक्ष्य प्राप्त गर्ने गरी बैंक तथा वित्तीय संस्थाहरुले कर्जा विस्तार गर्न नसक्ने देखिएको छ। नेपाल राष्ट्र बैंकले बजेटले अनुमान गरेको आर्थिक वृद्धि हासिल गर्न १२.५ प्रतिशतको कर्जा वृद्धिको लक्ष्य राखेको थियो। जसअनुसार सरकारले राखेको लक्ष्य प्राप्ति गर्नेगरी बैंकहरुले चालू वर्षमा ६.२५ प्रतिशत कर्जा वृद्धि गर्नुपर्ने थियो। चालू वर्षको ६ महिनामा बैंकिङ क्षेत्रको निक्षेत्र संकलन ३.३ प्रतिशत र कर्जा प्रवाह ४.४१ प्रतिशतमात्रै वृद्धि भएको हो।

चालू वर्षको साउन यता पुस मसान्तसम्म बैंक तथा वित्तीय संस्थाले २ खर्ब ११ अर्ब निक्षेप संकलन र २ खर्ब २८ अर्ब रुपैयाँ कर्जा प्रवाह गरेका छन्। गत वर्षको सोही अवधिमा बैंकहरुले ३ खर्ब ७७ अर्ब रुपैयाँ निक्षेप संकलन गरी १ खर्ब ९२ अर्ब रुपैयाँ कर्जा प्रवाह गरेका थिए। गत वर्ष निजी क्षेत्रमा प्रावाहित कर्जा प्रवाह ४ प्रतिशतले र निक्षेप संकलन ६.६ प्रतिशतले भएको थियो।

राष्ट्र बैंकले चालू वर्षको मौद्रिक नीतिमार्फत् सरकारको बजेटमा अनुमान गरिएबमोजिम ६.० प्रतिशतको आर्थिक वृद्धि हासिल गर्न सहयोग पुग्ने गरी तरलता व्यवस्थापन र कर्जा प्रवाहलाई उत्पादनशील क्षेत्रतर्फ उन्मुख गरिने उल्लेख थियो। उक्त लक्ष्य प्राप्त गर्नका लागि अबको ६ महिनामा बैंक तथा वित्तीय संस्थाले ८.०९ प्रतिशत निजी क्षेत्रमा कर्जा विस्तार गर्नुपर्ने हुन्छ।

तर, बैंकिङ क्षेत्रमा अहिलेको अवस्थामा कर्जाको माग नभएकै कारणले राष्ट्र बैंकले अधिक तरलता न्यून ब्याजदरमा निक्षेप संकलन विधिमार्फत् लिइरहेको छ। हालसम्म राष्ट्र बैंकले नै बैंकहरुको १५ खर्ब बढी निक्षेप औषत ३ प्रतिशत ब्याजदरमा लिइसकेको छ।

प्रकाशित मिति: आइतबार, माघ ६, २०८१ १७:२६

प्रतिक्रिया दिनुहोस्