चितवन। युवा उद्यमी मञ्च चितवनले शुक्रारदेखि ‘मेड इन नेपाल एक्स्पो’ तथा ‘फुड फेस्टिभल’ सुरु गरेको छ। नेपालमा उत्पादित सामग्रीलाई बजार प्रवर्द्धनमा सहयोग पुर्याउने उद्देश्यका साथ मेला आयोजना गरिएको हो।
नेपाल युवा उद्यमी मञ्चले सन् २००६ देखि सुरु गरेको यो मेला यस वर्ष सातौं संस्करण हो। मेलाको भरतपुर महानगर प्रमुख रेनु दाहालले उद्घाटन गरिन्। उनले निजी क्षेत्रलाई प्रोत्साहन गर्दै अर्थतन्त्रलाई चलायमान बनाउन सकिने बताइन्।
स्थानीयस्तरमा हुने मेला महोत्सवले यहाँको अर्थतन्त्रलाई चलायमान बनाउने हुँदा रोजगारी अवसर सृजना गर्न सहज हुने उनको भनाइ थियो।
सो अवसरमा मेडइन भरतपुरको लोगोसमेत सार्वजनिक गरिएको थियो। कार्यक्रममा नेपाल युवा उद्यमी मञ्चका अध्यक्ष कुशलसुन्दर श्रेष्ठ, भरतपुर महानगरपालिका–१ का वडाअध्यक्ष केशव महर्जन, उद्योग वाणिज्य संघका पूर्वअध्यक्ष राजन गौतम, उद्योग वाणिज्य संघका वरिष्ठ उपाध्यक्ष चिरञ्जीवी सुवेदी, चेम्बर अर्फ कमर्सका उपाध्यक्ष रुविन रामुदामु, युवा उद्यमी निकोलस पाण्डे, निशान पौडेललगायतले स्वदेशी उत्पादनको सम्मान गर्ने र नेपाली स्वाभिमान कायम गर्न सकेमा यहाँ उत्पादित सामानले बजार पाउन सहज हुने बताए।
वैशाख २ गतेसम्म नारायणगढको क्याम्पाचौरमा सञ्चालन हुने मेलाले नेपाली उत्पादनको पहिचान, गुणस्तर र प्रभावलाई जनमानसमा प्रभाव दिने विश्वास लिइएको छ।
मेला हरेक दिन बिहान १० देखि साँझ ६ बजेसम्म सञ्चालन हुनेछ। साँझ ५ देखि ९ बजेसम्म ‘ग्रान्ड फुड फेस्टिभल’ हुनेछ। एक्स्पोमा ११० भन्दा बढी स्टल छन्।
