अनुगमन गर्दै सुन पच गर्ने विरुद्ध अख्तियारले थाल्यो छानविन

उद्योग

गृहपृष्ठ
उद्योग

अनुगमन गर्दै सुन पच गर्ने विरुद्ध अख्तियारले थाल्यो छानविन

हरिप्रसाद शर्माआइतबार, मंसिर २२, २०७६

काठमाडौं । करिब चार बर्षअघि बजार अनुगमनका क्रममा सुनचाँदी पसलबाट परीक्षण गर्ने बहानामा आपूर्ति व्यवस्थापन विभागका कर्मचारीले ल्याएको सुन फिर्ता नदिएपछि अख्तियार दुरुपयोग अनुसन्धान आयोगले छानबिन शुरु गरेको छ ।

वाणिज्य आपूर्ति तथा उपभोक्ता हित संरक्षण विभागद्वारा गठित छानबीन समितिले बनाएको प्रतिवेदनका आधारमा छानबीन अघि बढाएको अख्तियारका प्रवक्ता प्रदीपकुमार कोइरालले बताए ।

‘आपूर्ति व्यवस्थापन विभागको विगत ४/५ बर्षको मुद्दा हो । यो बिषयमा आयोगमा उजुरी परेको छ, आयोगले भर्खरै छानबीन सुरु गरेको छ’ उनले क्यापिटल नेपालसंग भने, ‘छानबीनका आधारमा के हुन सक्छ, कानुन बमोजिम कारबाही हुन्छ ।’

अनुगमनका क्रममा नमुना परीक्षण गर्न ल्याएको केही सुन फिर्ता नगरेको भन्दै सुनचाँदी व्यवसायीले महासंघले उजुरी गरेको थियो । २१ व्यवसायीले अनुगमन गर्न लगेको सुन फिर्ता नपाएको भन्दै विभागमा उजुरी दिएका थिए ।

नमुना परीक्षणको सुनसँगै अनुगमनका केही फाइलसमेत गायब भएपछि तत्कालीन महानिर्देशक योगेन्द्र गौचनले असोज अन्तिममा छानबीन समिति गठन गरेका थिए । गठित छानबीन समितिले यसअघि नै प्रतिवेदन बुझाइसकेको छ ।

विभागका महानिर्देशक नेत्रप्रसाद सुवेदीले प्रतिवेदन मन्त्रालयमा पेश गरेका थिए । प्रतिवेदन बुझाए पनि कारबाही प्रक्रिया अघि बढेको थिएन । समितिले छानबिनका क्रममा करिब ४२ वटा सुन पसलको अनुगमनका फाइल फेला परेको छ । त्यसमध्ये केही नमुना फिर्ता नभएको समेत पाइएको स्रोतले बतायो ।

प्रकाशित मिति: आइतबार, मंसिर २२, २०७६ १८:१८

प्रतिक्रिया दिनुहोस्