मातातीर्थ औँशीमा मध्यपुर थिमि सहकारीका आमाहरूलाई सम्मान

सहकारी

गृहपृष्ठ
सहकारी

मातातीर्थ औँशीमा मध्यपुर थिमि सहकारीका आमाहरूलाई सम्मान

क्यापिटल नेपालआइतबार, वैशाख १४, २०८२

काठमाडौं। भक्तपुरको मध्यपुर थिमि सहकारीले समाजप्रति उत्तरदायित्व कार्यक्रमअन्तर्गत मातातीर्थ औँशीको अवसरमा आमाहरूको संयुक्त मुख हेर्ने कार्यक्रम सम्पन्न गरेको छ।

संस्थामा आवद्ध रहेका ६० वर्ष पुगेका आमाहरूलाई पूर्वीय संस्कारअनुसार टीका लगाइदिएर उपहार दिएर सम्मान गरेको हो। जिवित भगवान रुपी आमाहरूको सम्मान, सभ्य समाजको पहिचान नारा दिएर संस्थाले ५७ जना आमाहरूलाई संयुक्त रुपमा सम्मान गरेको संस्थाका सचिव अनिल श्रेष्ठले जानकारी दिए।

कार्यक्रममा मध्यपुर थिमि नगरपालिका ५ का वडाध्यक्ष बालकृष्ण श्रेष्ठले सबै सहकारीलाई एउटै नजरले हेर्न नहुने बताए। उनले जेष्ठ नागरिक आमाहरूलाई वित्तीय संस्थामा हालै देखिएको विचलनप्रति सचेत रहन आग्रह गरे।

वडाध्यक्ष श्रेष्ठले सामाजिक कार्य गर्दै आएको, वार्षिक साधारण गरेको, आफ्ना सदस्यहरूप्रति जवाफदेही रहेको, सहकारी नीति बमोजिम सञ्चालनमा रहेको र स्थानीय बासिन्दाले सञ्चालन गरेको संस्थामा तुलनात्मक रूपमा कम समस्या देखिएको बताए।

सीमित गलत सहकारी संस्थाहरूको कारणले गर्दा सम्पूर्ण सहकारी अभियान नकारात्मक रूपमा प्रभावित भइरहेको उनको भनाइ थियो। करिब ३० हजारको संख्यामा रहेका नेपालका सहकारी संस्था केही गलत नियतले सञ्चालन भएका सहकारीबाट प्रभावित हुनु परेको तीतो यथार्य रहेको विषयमा कार्यक्रममा चर्चा गरिएको थियो।

प्रकाशित मिति: आइतबार, वैशाख १४, २०८२ १२:५२

प्रतिक्रिया दिनुहोस्