मर्स्याङ्दी आयोजना प्रभावित १९ परिवारलाई साढे २१ करोड मुआब्जा बाँडियो

पूर्वाधार

गृहपृष्ठ
पूर्वाधार

मर्स्याङ्दी आयोजना प्रभावित १९ परिवारलाई साढे २१ करोड मुआब्जा बाँडियो

क्यापिटल नेपालमंगलबार, वैशाख ९, २०८२

तनहुँ। आँबुखैरेनी गाउँपालिका–४ स्थित मर्स्याङ्दी जलविद्युत् केन्द्रबाट प्रभावित १९ परिवारलाई मुआब्जा वितरण गरिएको छ।

केन्द्रका अनुसार १४ परिवारका जग्गा र पाँच घरसहित ९ रोपनी १० आना दुई पैसा तीन दाम जग्गा अधिग्रहण गरेपछि मुआब्जा वितरण गरिएको हो।

जग्गा अधिग्रहणका लागि २१ करोड ७८ लाख ८५ हजार ९६७ रकम दिइएको केन्द्रका प्रमुख इन्जिनियर पशुपति गौतमले जानकारी दिए। उनका अनुसार जग्गाका लागि १७ करोड ८७ लाख ८६ हजार छ सय ५२ र घर टहराका लागि तीन करोड ९० लाख ९९ हजार ३१५ वितरण गरिएको छ।

प्रमुख जिल्ला अधिकारीको अध्यक्षतामा बसेको मुआब्जा निर्धारण समितिको बैठकको निर्णयअनुसार प्रतिरोपनी एक करोड ८४ लाख ९२ हजार ६८० का दरले जग्गाको मुआब्जा निर्धारण गरिएको थियो।

आँबुखैरेनी गाउँपालिका–२ एक्लेफाँटका बासिन्दा डुबानमा परेपछि मुआब्जाका लागि आन्दोलन गर्दै आएका थिए। अहिले मुआब्जा पाएपछि प्रभावित बासिन्दा खुसी भएका छन्।

केन्द्रको बाँध किनारमा रहेका स्थानीयको जग्गा स्थायी रूपले प्राप्त गर्नका लागि निर्धारण गरिएको मुआब्जा वितरण कार्य पूरा भएको केन्द्रका प्रमुख गौतमले जानकारी दिए।

उनका अनुसार ६९ मेगावाट विद्युत् उत्पादन क्षमता रहेको आयोजनाको बाँधले सो क्षेत्रको बस्ती डुबान र कटानमा परेपछि जग्गा अधिग्रहण गरिएको हो।

ढिलै भए पनि मुआब्जा पाएपछि प्रभावित बासिन्दा खुसी भएको आँबुखैरेनी गाउँपालिकाका अध्यक्ष शुक्र चुमानले बताए।–रासस

प्रकाशित मिति: मंगलबार, वैशाख ९, २०८२ ०७:१९

प्रतिक्रिया दिनुहोस्