काठमाडौं। नाडा नेपाल अटो मोबाइल एसोसिएसन नाडाका अध्यक्ष करण चौधरी नेतृत्वको प्रतिनिधिमण्डलले वाणिज्य, आपूर्ति तथा उपभोक्ता संरक्षण विभागका महानिर्देशक केदार दाहाल भेटेर विभिन्न विषयमा छलफल गरेको छ।
अध्यक्ष चौधरीले २०८१ चैत १४ मा वस्तुमा लेबल राख्ने सम्बन्धमा विभागबाट प्रकाशित सूचनाबारे छलफल भएको बताएछ। उक्त सूचनामा राखिएका प्रावधानमा केही अस्पष्टता रहेकाले स्पष्ट पार्न आग्रह गरिएको उनको भनाइ छ।
सवारी साधनको अधिकतम मूल्यसूची प्रकाशनबारे स्पष्ट नीति आवश्यक भएको, स्पेयर पाट्र्समा अधिकतम मूल्यसूची राख्ने तरिका क्यूआर कोडको माध्यमबाट मूल्य निर्धारण गर्ने कि अन्य कुनै तरिका अपनाउने भन्नेबारे प्रस्ट हुनुपर्ने नाडा पदाधिकारीले महानिर्देशकसँग आग्रह गरेका थिए।
यस्तै, ब्लकमा आउने गाडीमा अधिकतम मूल्यसूची लागू गर्ने कि नगर्ने भन्ने विषयमा कानुनी स्पष्टता हुनु्पर्ने, स्पेयर पाट्र्समा अधिकतम मूल्यसूची अनलाइन वा अफलाइन कस्तो ढाँचामा राख्ने, डिजिटल तथा गैरडिजिटल माध्यमबाट मूल्यसूचीलाई कसरी पारदर्र्शी बनाउने, स्पेयर पार्टस्मा आउने नटबोल्टमा अधिकतम मूल्यसूची के–कसरी लगाउने भन्ने विषयमा छलफल भएको नाडाले जनाएको छ।
नाडा महासचिव सुरेन्द्रकुमार उप्रेतीले यस विषयमा थप स्पष्टता आवश्यक रहेको बताउँदै डिजिटल माध्यमबाट स्पेयर पाट्र्सको मूल्य निर्धारण गर्न क्यूआर कोडको प्रभावकारी प्रयोग गर्न सकिने र अनलाइन प्रणालीलाई व्यवस्थित बनाउने धारणा राखे।
भेटमा विभागका महानिर्देशक दाहालले भौतिक वस्तु वा कमोडिटीको अधिकतम मूल्यसूची प्रकाशित गर्ने अवधारणा पुरानो भए पनि यस प्रक्रियालाई अझ प्रभावकारी बनाउन आवश्यक रहेकाले पारदर्शी बनाउन अधिकतम मूल्यसूची स्पष्ट देखिने गरी टाँस्नुपर्ने बताए। महानिर्देशक दाहालले डिजिटल र ननडिजिटल अधिकतम मूल्यसूचीलाई क्यूआर कोडमार्फत प्रभावकारी कार्यान्वयन गरेर अनलाइन माध्यमलाई समेट्नुपर्ने धारणा व्यक्त गरे।
छलफलमा नाडाका निवर्तमान अध्यक्ष डा. धु्रव थापा, कोषाध्यक्ष मिलनबाबु मल्ल, सहकोषाध्यक्ष पंकज अग्रवाल केन्द्रीय कार्यसमिति सदस्यद्वय दीपेन्द्र मिश्रा, प्रकाश कपुरी, सोहन श्रेष्ठ, मेघराज पौडेल, प्रदीपमान प्रधान र आमन्त्रित सदस्य नारायणप्रसाद पौडेलसमेत उपस्थित थिए।
