काठमाडौं। राष्ट्रिय स्वतन्त्र पार्टी(रास्वपा)का उपसभापति एवं कार्यवाहक सभापति डोलप्रसाद (डीपी)अर्यालले आफ्ना सांसदहरूलाई नेपाल एयरलाइन्सको बेतिथिविरुद्ध नबोल्न रुलिङ गरेका छन्।
विगत ९ महिनादेखि ठप्प रहेको आन्तरिक उडानसहित एयरलाइन्सभित्रको बेतिथिविरुद्ध संसदको शून्य समयमा बोल्ने तयारीमा रहेका रास्वपाका एक सांसदलाई अन्तिम समयमा रोकिदिएको खुलेको हो।
संसद सचिवालयका अनुसार ती सांसदले शुक्रबारको बैठकमा नेपाल एयरलाइन्सभित्रको बेतिथिबारे बोल्न सभामुखसँग समय मागेका थिए। उनले एयरलाइन्सभित्र चरम बेतिथि रहेकाले संसदमा आवाज उठाउनुपर्ने छ भन्दै सभामुखलाई सकेसम्म धेरै समय दिन अनुरोध गरेका थिए।
संसद सचिवालका अनुसार ती सांसदले क्यापिटल नेपालमा प्रकाशित, ‘आन्तरिक उडान अनिश्चित, पाइलटको तलब ७ लाख निश्चित’ भन्ने शीर्षकको समचार प्रिन्ट गरेर सभामुख देवराज घिमिरेलाई देखाएका थिए। सभामुख घिमिरेले पनि विषय गम्भिर रहेकाले ३ मिनेटको समय उनलाई दिने प्रतिबद्धता जनाएका थिए।
जब सभामुखबाट समय प्राप्त भएपछि आफ्ना पार्टीका उपसभापतिलाई पनि उनले जानकारी गराएका थिए। यसपछि उपसभापति अर्यालले समचारमा आएको विषय सही हो वा हैन भन्ने विषयमा एयरलाइन्सका अध्यक्ष युवराज अधिकारीलाई बुझेर खबर गर्ने बताए।
अर्यालले अधिकारीलाई फोन गरेपछि अहिलेसम्म आन्तरिक उडान ठप्प नभएको जवाफ दिए। सोही जवाफअनुसार उपसभापति अर्यालले आफ्ना सांसदलाई फोन गरेर अहिले आन्तरिक उडान ठप्प नरहेको र समचारको विषयमा कुनै सत्यता नभएको भन्दै नबोल्न निर्देशन दिए।
उपसभापतिको निर्देशनपछि निरास भएका ती सांसदले अझै चित्त बुझाएनन्। र आफ्नो श्रोत प्रयोग गरेर नेपाल नागरिक उड्डयन प्राधिकरणमा नेपाल एयरलाइन्सको आन्तरिक उडानको अवस्था कस्तो छ भनेर बुझे। प्राधिकरणबाट लामो समयदेखि नेपाल एयरलाइन्सको आन्तरिक उडान ठप्प रहेको र अन्तर्राष्ट्रिय उडान पनि नियमित नभएको खबर पाए।
प्राधिकरणको खबरपछि हौसिएका ती सांसदले पुनः आफ्ना उपसभापतिलाई फोन गरेर जानकारी गराए। प्राधिकरणको जवाफ सुनाएपछि संसदमा निर्धक्कका साथ बोल्न पाइन्छ भन्ने अपेक्षा राखेका सांसदले उपसभापतिको जवाफ सुनेपछि अक्कनबक्क बने। उपसभापति अर्यालले हालसम्म कसैले पनि नबोलेको विषय र अरुले चासो नदिइरहेको विषयमा बोल्न आवश्यक नरहेको जवाफ फर्काए।
ती सांसद निकटका अनुसार उपसभापतिको जवाफपछि संसदमा अन्य विषयमा बोलेका थिए। ती सांसदले संसदमा बोलेको विषय सुनेर सभामुख घिमिरेसमेत चकित भए। आफूसँग समय माग्दाको विषय र बोल्दाको विषय फरक परेपछि सभामुख अन्योलमा परेको संसद सचिवालका एक अधिकारीको भनाइ छ।
संसदमा बोल्ने विषयमा क्यापिटल नेपालसँग कुरा गर्दै उनले आफ्नो उपसभापतिको बचाउ गर्दै सभामुखले कम समय दिएकाले अरु विषयमा कुरा राखेको प्रतिक्रिया दिए। यस्तो थियो समाचार-
-1741480500.jpg)
