काठमाडौं। जीवन बिमा कम्पनीहरूमा ‘पोलिसी सरेन्डर’ अर्थात् बिमा बिमा समर्पण ह्वात्तै बढेको छ। बीमितले जीवन बिमा लेख समय समाप्त हुनुआगावै लेख त्याग गर्दा एक महिनामै पोलिसी सरेन्डर १५ प्रतिशतले थपिएको हो।
बिमा समर्पण जीवन बिमा योजनाअन्तर्गत बीमितले तोकिएको अवधि समाप्त नहुँदै बिमा पोलिसी बन्द गर्ने वा त्याग्ने प्रक्रिया हो। आजीवन बिमा लेख खरिद गरी निर्धारित समयअगावै समर्पण गर्ने र तोकिएको समय प्रिमियम नतिर्ने बीमित बढ्दा सञ्चालनमा रहेका १४ जीवन बिमा कम्पनीबाट चालू वर्षको माघसम्म ८ अर्ब ५९ करोड रुपैयाँ बराबरको २६ हजार ५ सय २३ वटा बिमालेख समर्पण भएको छ।
बिमा प्राधिकरणको तथ्यांकअनुसार गत पुसको तुलनामा बिमालेख समर्पण संख्या १४.९० प्रतिशत र बिमालेख समर्पण रकम १५.०५ प्रतिशतले थप भएको हो। २०८१ पुससम्म ७ अर्ब ४६ कारोड ६६ लाख रुपैयाँ बराबरका ५४ हजार ४ सय १४ जीवन बिमालेख समर्पण भएका थिए। माघमा आइपुग्दा १ अर्ब १२ करोड ३५ लाख रुपैयाँ बराबरको ८ हजार १ सय ९ वटा बिमालेख थप समर्पण भएको हो।
अघिल्लो वर्षदेखि नै समग्र अर्थतन्त्र नै मन्दीको अवस्थामा भएका बेला बीमितले खरिद गरेको बिमालेख सरेन्डर गरेर अन्य आवश्यकता पूरा गर्न होस् वा आर्थिक अभावमा नियमित प्रिमियम तिर्न नसक्दा बिमालेख समर्पण संख्या बढिरहेको छ। साथै, बिमा लेखको फाइदाबारे बिमा अभिकर्ता र कम्पनीले बीमितलाई राम्रोसँग बुझाउन नसक्दा पनि समर्पण बढेको हो।
चालू वर्षको माघमा सबैभन्दा बढी बिमालेख समर्पण लाइफ इन्स्योरेन्स कर्पोरेसन नेपाल (एलआईसी)को भएको छ भने सबैभन्दा कम सन् नेपाल लाइफ इन्स्योरेन्सको भएको छ।
एलआईसीको माघमा २ अर्ब ५९ करोड ७९ लाख रुपैयाँ बराबरको १५ हजार ३ सय ६२ वटा बिमालेख समर्पण भएको छ। उक्त अवधिमा सन् नेपालबाट ४ करोड ५५ लाख रुपैयाँ बराबरको ४ सय ४२ वटा बिमालेख समर्पण भएको प्राधिकरणको तथ्यांक छ।
यस्तै दोस्रोमा नेपाल लाइफको २ अर्ब ३६ करोड २४ लाख बराबरको १४ हजार २५ वटा समर्पण भएको छ।
चालू वर्षको माघसम्म सञ्चालनमा रहेका जीवन बिमा कम्पनीमध्ये एनआईसी र नेपाल लाइफ इन्स्योरेन्सबाहेक १० वटा कम्पनीमा १० करोड रुपैयाँमाथि ७९ करोड रुपैयाँ बराबरको बिमा पोलिसी समर्पण भएका छन् भने २ वटा कम्पनीको मात्रै ६ करोड तल बराबरको बिमालेख समर्पण भएको छ।
