काठमाडौं। नेपाल बिमा प्राधिकरणले बैंक, वित्तीय संस्था र नगद कारोबार गर्ने अन्य संस्थाको नगद तथा नगदजन्य उपकरण सुरक्षा एवं जोखिम व्यवस्थापनलाई थप सुदृढ बनाउन नयाँ मौद्रिक क्षति बिमासम्बन्धी निर्देशिका, २०८१ सार्वजनिक गरेको छ।
नयाँ निर्देशिकाले बैंकर क्षतिपूर्ति बिमालेख, नगद बिमालेख र निष्ठा जमानी बिमालेखको लागि स्पष्ट बिमाशुल्क दर निर्धारण गरेको प्राधिकरणले जनाएकाे छ। बैंकर क्षतिपूर्ति बिमालेखअन्तर्गत आधारभूत बीमांकको बिमाशुल्क २.७५ प्रतिशत तोकिएको छ।
अतिरिक्त बीमांकका लागि प्रतिरक्षावरण १ प्रतिशत बीमाशुल्क लाग्नेछ। निष्ठा जमानीबापतको बिमाशुल्क भने प्रतिकर्मचारी १० रुपैयाँ निर्धारण गरिएको छ।
नगद बीमालेखमा, काउन्टर वा सेफरभल्टमा राखिएको नगद तथा नगदजन्य उपकरणको बिमाशुल्क प्रतिहजार रुपैयाँमा २ रुपैयाँ तोकिएको छ।
पारवहन प्रक्रियामा रहेको नगद तथा नगदजन्य उपकरणका लागि १.५ प्रतिशत बिमाशुल्क निर्धारण गरिएको छ। यसका अतिरिक्त, हुलदंगा, हड्ताल, द्वेषपूर्ण कार्य र आतंकवादसम्बन्धी जोखिमका लागि बिमाशुल्क प्रतिहजार रुपैयाँमा १.२५ रुपैयाँ तोकिएको छ।
प्राधिकरणका सहायक निर्देशक राम कोजुका अनुसार यो निर्देशिका बैंक तथा वित्तीय संस्थाहरूको अलावा नगद कारोबार गर्ने सहकारी संस्था, सुनचाँदी पसललगायतका अन्य संस्थालाई पनि समेटेर तयार गरिएको हो।
यसले बीमक र बीमितबीचको द्विपक्षीय करारलाई थप स्पष्ट पार्दै, बिमा अवधि समाप्त हुनुभन्दा कम्तीमा १५ दिन अगाडि बीमितलाई सूचना दिनुपर्ने व्यवस्था गरेको छ।
बिमा अवधिभित्र बिमाशुल्क दर परिवर्तन गर्न नपाइने प्रावधानले बीमित हितलाई संरक्षण गर्ने उद्देश्य राखेको छ।
