नेपाल एयरलाइन्सको टिकटबाट अमेरिका र कोरिया जान पाइने

पर्यटन

गृहपृष्ठ
पर्यटन

नेपाल एयरलाइन्सको टिकटबाट अमेरिका र कोरिया जान पाइने

क्यापिटल नेपालबिहीबार, फागुन ८, २०८१

काठमाडौं। राष्ट्रिय ध्वजावाहक नेपाल वायुसेवा निगम र जापानको राष्ट्रिय ध्वजावाहक जापान एयरलाइन्सबी व्यापार विस्तारको लागि द्विपक्षीय सम्झौता भएको छ।

सम्झौतापछि निगमको सीधा उडान मार्फत जापानको नारिता अन्तर्राष्ट्रिय विमानस्थलसम्म निगमको जहाजमा र त्यसपछिको छोटो तथा छिटो कनेक्टिङ फ्लाइटमार्फत विभिन्न अमेरिकी तथा पश्चिमा मुलुक एवं कोरियाको यात्रा गर्न सहज हुनेछ।

सम्झौताअनुसार निगमको टिकटबाट जापान एयरलाइन्सको उडानमार्फत विश्वभरिको अन्तिम गन्तव्यसम्मको लागि यात्रु तथा व्यागेज चेक–इन सुविधा हुने जनाइएको छ। त्यसैगरी विश्वभरिबाट पर्यटकले सहज रूपमा नेपाल भ्रमण गर्न सक्नेछन्।

यसबाट निगमको व्यापार विस्तार हुनुको साथै पर्यटन प्रवर्द्धन र विकास तथा विदेशी मुद्रा आर्जर्नमा टेवा पुग्ने विश्वास लिइएको छ।

निगमका कार्यकारी अध्यक्ष युवराज अधिकारीको निर्देशनमा भएको सम्झौतापछि दुई देशका राष्ट्रिय ध्वजावाहकमार्फत एकआपसमा व्यापार विस्तार, यात्रुको यात्रा सहज तथा किफायती हुने, विश्वभरका विभिन्न मुलुक एवं जापानको विभिन्न आन्तरिक गन्तव्यसम्म निगमकै टिकटमा विश्वस्तरिय सेवा दिन सकिने निगमले जनाएको छ।