काठमाडौं। वित्तीय विवरण सकारात्मक देखिएसँगै लघुवित्त (माइक्रोफाइनान्स) कम्पनीतर्फ लगानीकर्ताको आकर्षण बढेको छ। चालू आर्थिक वर्षको दोस्रो त्रैमासिकसम्मको वित्तीय विवरणमा लघुवित्त कम्पनीको अवस्था सकारात्मक रहँदा सेयर लगानीकर्ताको रोजाईमा यस समूह परेको हो।
साताको कारोबारको दोस्रो दिन सोमबार सेयर बजार सूचक नेपाल स्टक एक्सचेञ्ज (नेप्से) २९.८७ अंकले बढ्दा लघुवित्त समूह २.४५ प्रतिशतले उकालो लागेको छ। आइतबार पनि लघुवित्त समूहका लगानीकर्ताको राम्रै आकर्षण देखिएको थियो।
सोमबार उच्च सेयर मूल्य बढ्ने कम्पनीको सूचीमा लघुवित्त कम्पनी नै अगाडि छन्। आज विन नेपाल लघुवित्त वित्तीय संस्था, गुराँस लघुवित्त गरी दुई लघुवित्त कम्पनीको सेयर मूल्यमा सकारात्मक सर्किट लाग्दा यस समूहका ४७ कम्पनीको सेयर मूल्य बढेको छ। ३ लघुवित्त कम्पनीको सेयर मूल्य मात्रै घटेको छ।
खासगरी, लघुवित्त कम्पनीहरुले सार्वजनिक गरेको चालु आर्थिक वर्षको दोस्रो त्रैमाससम्मको वित्तीय विवरणअनुसार सूचीकृत ५० कम्पनीले २ अर्ब ७८ करोड रुपैयाँ नाफा कमाएका छन् जुन गत आर्थिक वर्षको सोही अवधिको तुलनामा ५०.४७ प्रतिशत बढी हो।
लघुवित्त कम्पनीहरुले गत आर्थिक वर्षको दोस्रो त्रैमाससम्म भने १ अर्ब ८४ करोड रुपैयाँ नाफा मात्रै कमाएका थिए। सार्वजनिक वित्तीय विवरणअनुसार ७ कम्पनी घाटामा छन् जबकि, अघिल्लो वर्षको यस अवधिमा १२ कम्पनी घाटामा थिए।
समिक्षा अवधिमा नाफामा गएका ४२ वटामध्ये पनि ६ वटाको नाफा घट्दा ३६ वटाको भने बढेको देखिन्छ। समग्रमा, लघुवित्त कम्पनीहरुको वित्तीय विवरण सकारात्मक देखिँदा लगानीकर्ता यस समूहतर्फ आकर्षित भएका हुन्।
सोमबार नेप्से २९.८७ अंकले बढ्दै २७२७.९१ बिन्दुमा पुग्दा कुल १० अर्ब बढीको कारोबार भएको छ। अघिल्लो कारोबार दिन आइतबार नेप्से १९.५६ अंकले बढेर २६९८ बिन्दुमा रहँदा कुल ९ अर्ब २७ करोड रुपैयाँ बराबरको कारोबार भएको थियो।
सोमबार कारोबारमा आएकामध्ये १६६ कम्पनीको सेयर मूल्य बढ्दा ७४ कम्पनीको घटेको छ। यस्तै, ४ कम्पनीको सेयर मूल्य स्थिर छ।
आज दुई लघुवित्त कम्पनीसँगै एक्सेल विकास बैंक, गार्डियन माइक्रो लाइफ इन्स्योरेन्स र दिव्यश्वरी हाइड्रोपावरको सेयर मूल्यमा पनि सकारात्मक सर्किट लागेको छ। सप्तकोशी विकास बैंकको सेयर मूल्यमा भने नकारात्मक सर्किट लागेको छ।
सोमबार लघुवित्त समूह २.४५ प्रतिशतले बढ्दा बैंकिङ समूह २.१६ प्रतिशत, विकास बैंक समूह ०.३३ प्रतिशत, होटल तथा पर्यटन समूह २.२९ प्रतिशत र लगानी समूह ०.२० प्रतिशतले वृद्धि भएको छ।
यस्तै, जीवन बिमा समूह ०.८९ प्रतिशत, उत्पादन समूह ०.७७ प्रतिशत, निर्जीवन बिमा समूह १.०७ प्रतिशत र अन्य समूह २.४७ प्रतिशतले बढेको छ।
आज व्यापार समूह १.२७ प्रतिशतले संकुचित हुँदा जलविद्युत् समूह ०.१५ प्रतिशत र फाइनान्स समूह ०.८४ प्रतिशतले घटेको छ।
-1741480500.jpg)
