काठमाडौं। काठमाडौं उपत्यकामा सञ्चालित तारे होटलहरुको अकुपेन्सी औसत २० प्रतिशतमा झरेको छ। अंग्रेजी नयाँ वर्ष २०२५ र क्रिसमसपछि खाली हुँदै आएको होटलको अकुपेन्सी अहिले औसत २० प्रतिशतमा झरेको हो।
खासगरी विदेशी पर्यटकहरु नयाँ वर्ष र क्रिसमसको बेला आफ्नै घरमा परिवारसँग बस्ने गरेको र घुमघाममा निस्कनेको संख्या न्यून हुँदा त्यसको प्रभाव होटल क्षेत्रमा परेको हो। पर्यटक आगमणको संख्या घटेसँगै तारे होटलहरुले बेच्ने कोठाको मूल्य समेत घटाउन थालेको छ।
होटल एसोसिएन अफ नेपाल(हान)का एक उच्च पदाधिकारीका अनुसार अहिले पाँचतारे होटलबीच ‘प्राइस वार’ सुरु भएको छ। आफ्नो होटलमा ग्राहक तान्न विभिन्न अफरहरु दिएर एजेन्सीहरुलाई लोभ्याउँदै छन्।
अहिले विभिन्न पाँचतारे एवम् चेन होटलहरुमा ग्राहक तान्ने प्रतिस्पर्धानै सुरु भएको छ। एक होटल व्यवसायीका अनुसार १५ देखि २० हजारसम्ममा बिक्री गर्दै आएको कोठा अहिले ८ देखि १० हजारसम्ममा दिन थालिएको छ। त्यो मूल्यमा पनि बेलुकाको डिनर, बिहानको ब्रेकफास्ट र लञ्चसँगै बसोबास सुविधा पनि छ।
‘पाँचतारे होटलमै तीन छाक खाएर ८ देखि १० हजारमा डिलक्स रुमहरु पाउन थालेपछि अन्य स्तरका होटलमा किन जान्थ्ये,’ एक सञ्चालकले भने, ‘ठूला होटलको प्राइसवारमा अहिले साना होटल मारमा परिरहेका छन्।’
उसै पनि अहिले आउने पर्यटकको संख्या भन्दा तेब्बर अट्ने क्षमताको होटल सञ्चालनमा छ। अर्थात् ३० लाख पर्यटकलाई सुविधा दिन सक्ने गरी होटलहरु सञ्चालनमा रहेको छन्। नेपाल पर्यटन बोर्डका अनुसार सन् २०२४ मा ११ लाख ४७ हजार ५६७ पर्यटक नेपाल घुम्न आएका छन्।
नयाँ होटलको मारमा पुराना
सन् २०२४ भरी र सन् २०२५ को सुरुवात गरेर आधा दर्जन होटलहरु सञ्चालनमा आए। ती मध्ये अधिकांश विदेशी चेन होटलहरु छन्। ती होटलहरुले आकर्षक योजना भन्दै विभिन्न प्याकेजहरु दिएर पर्यटकहरु आकर्षण गर्न थालेका छन्।
अहिले मूल्य घटाएर कोठा बेच्नेमा पुरानो भन्दा नयाँ होटलहरु नै हुन्। सञ्चालन खर्च कम रहेको कारणले पनि पुराना भन्दा नयाँ होटललाई मूल्य घटाएर बेच्दा समेत घाटा नहुने तर्क ती व्यवसायीको छ। ‘मूल्य घटाउने प्रतिस्पर्धाले धेरैलाई समस्यामा पारिरहेको छ,’ एक पुराना होटल व्यवसायीले भने, ‘आफू टिक्ने बाहनामा अरुलाई समाप्त पार्न खोजिँदै छ, जुन व्यवसायको लागि राम्रो हैन।’
-1741480500.jpg)
