इन्डक्सन चुलोमा अनुदान दिने प्रधानमन्त्री देउवाको घोषणा

मुख्य समाचार

गृहपृष्ठ
मुख्य समाचार

इन्डक्सन चुलोमा अनुदान दिने प्रधानमन्त्री देउवाको घोषणा

क्यापिटल नेपालमंगलबार, कात्तिक ३०, २०७८

काठमाडौ । प्रधानमन्त्री शेरबहादुर देउवाले स्वच्छ ऊर्जा (क्लिन इनर्जी) मा नेपाललाई विश्वकै नमुना देश बनाउन अग्रसर हुन स्वतन्त्र ऊर्जा उत्पादक संस्था नेपाल (इपान) लाई अनुरोध गरेका छन् ।

इपानको मंगलबार राजधानीमा सुरु भएको १९ र २० औं साधारणसभालाई सम्बोधन गर्दै प्रधानमन्त्री देउवाले जलवायु परिवर्तनले विश्वभर समस्या गरिरहेको बेला नेपालले क्लिन इनर्जी विकासमा नेतृत्व गर्नुपर्ने र त्यसका लागि सरकारले आवश्यक अनुदान दिन तयार रहेको प्रतिबद्धतासमेत जनाएका छन् । उनले निजी क्षेत्रलाई सरकारको पूर्ण समर्थन रहेको जानकारी गराए ।

बेमौसमी वर्षा आउनुमा नेपालको कुनै दोष नभएको भन्दै यसमा ठूला उद्योग रहेको मुलुक दोषी रहेको प्रधानमन्त्रीले बताएका छन् । उनले विद्युतीय चुलोमा सरकारले अनुदान दिन तयार रहेको बताउँदै काठमाडौं मा इलेक्ट्रिक गाडीहरु चलाउनुपर्नेमा जोड दिए ।

स्वदेशमा उत्पादन भएको बिजुली सदुपयोगका लागि विद्युतीय गाडी र विद्युतीय चुलो प्रयोग गर्न आवश्यक रहेको र यसमा सहयोग गर्न सरकार तयार रहेको प्रधानमन्त्रीले बताए । यस्तै झोलामा लाइसेन्स लिएर मात्र नहुने बताउँदै प्रधानमन्त्री देउवाले काम सुरु गर्न लगानीकर्तालाई निर्देशनसमेत दिए।

प्रकाशित मिति: मंगलबार, कात्तिक ३०, २०७८ ११:१८

प्रतिक्रिया दिनुहोस्