चिसो बढेसँगै सतर्कता अपनाउन स्वास्थ्य मन्त्रालयको सुझाव

काठमाडौं– स्वास्थ्य तथा जनसंख्या मन्त्रालयले उपत्यकासहित मुलुकभर चिसो बढेसँगै सतर्कता अपनाउन सबैलाई आग्रह गरेको छ। मन्त्रालयका प्रवक्ता डा. सञ्जयकुमार ठाकुरले जाडो महिनामा केही रोगको प्रकोप बढ्ने भएकाले सर्तकता अपनाउन आग्रह गरेका हुन्। 

केही दिनदेखि चिसो बढ्दै गएकाले ज्येष्ठ नागरिक, दीर्घरोगी, बालबालिका र गर्भवती महिला विशेष सावधान अपनाउन उनले आग्रह गरे। तथ्यांकअनुसार आज बिहान काठमाडौं उपत्यकाको तापक्रम ७.६ डिग्रीमा झरेको छ। चिसोबाट बच्न न्यायो लुगा लगाउन, टाउको र छातीलाई चिसोबाट जोगाउन र रातको समयमा सिरक कम्बलजस्ता न्यायो कपडा ओढ्न मन्त्रालयले आग्रह गरेको छ। 

जाडो बढेसँगै तराईका कतिपय जिल्लामा हुस्सुसमेत लाग्न थालेको छ। यस्तै घरबाहिर खुला स्थानमा धेरै समय नबस्न, तातो खानेकुरा तातोपानी पिउनसमेत आग्रह गरिएको छ। हिटर वा आगो ताप्दा, गिजर प्रयोग गर्दा कोठामा राम्रोसँग हावा आउजाउ व्यवस्था गर्नुपर्ने मन्त्रालयले जनाएको छ।

‘हावा आउजाउको व्यवस्था नहुँदा कतिपय अवस्थामा निस्सासिएर दुर्घटना हुनुपर्नेजस्ता घटना अवस्था आउने गरेको पाइन्छ’, उनले भने, ‘त्यसैले हिटर गिजर प्रयोग गर्दा हावा आउजाउ हुने ठाउँ रहेको हुनुपर्दछ।’ चिसोले गर्दा मुटु रोग, हृदयघात, फोक्सोमा समस्या श्वासप्रश्वास, बालबालिका तथा ज्येष्ठ नागरिकमा निमोनिया, रुघाखोकी, ज्वरोजस्ता रोगका समस्या देखिन सक्छ। 

त्यसैगरी दूषित खाना र पानीबाट अधिकांश रोग सर्ने भएकोले खानेकुरामा ध्यान दिनसमेत मन्त्रालयको आग्रह छ। खानेकुरा र खानेपानी सफा भाँडामा ढाकेर राख्न, खाना बनाउनुअघि र खानुअघि साबुन पानीले राम्रोसँग हात पनि मन्त्रालयले आग्रह गरेको छ।