सुदूरपश्चिममा चार वर्षमा २१ सय ८८ जनाले गरे आत्महत्या

धनगढी- सुदूरपश्चिममा आत्महत्या गर्नेको संख्या बढेको छ। प्रदेशमा चार वर्ष अवधिमा दुई हजार बढीले आत्महत्या गरेका छन्।सुदूरपश्चिम प्रदेश प्रहरी कार्यालयका अनुसार आव २०७४/०७५ देखि  आव २०७७/०७८ सम्म दुई हजार एक सय ८८ जनाले आत्महत्या गरेका छन्। 

आव २०७४/०७५ मा चार सय ९६ जनाले आत्महत्या गरेकामा आव २०७७/०७८ मा ६ सय ८० जनाले आत्महत्या गरेको प्रदेश प्रहरी कार्यालयले जनाएको छ। आव २०७४/०७५ भन्दा आर्थिक वर्ष ०७५/०७६ मा आत्महत्या गर्नेको संख्या घटेको भए पनि त्यसपछिका वर्षमा भने बढेको देखिएको छ। 

आव ०७५/०७६ मा चार सय ७५ जनाले आत्महत्या गरेकोमा आव ०७६/०७७ मा पाँच सय ३७ जनाले आत्महत्या गरेका छन्। सुदूरपश्चिम प्रदेश प्रहरीका अनुसार प्रदेशमा झुण्डिएर आत्महत्या गर्नेको संख्या उच्च छ। चार वर्षमा सुदूरपश्चिममा एक हजार पाँच सय ३३ जनाले आत्महत्या गरेका छन्। आव ०७४/०७५ मा दुई सय ९४ जनाले झुण्डिएर आत्महत्या गरेकोमा आव ०७५/०७६ मा तीन सय ३८, आव ०७६/०७७ मा चार सय पाँच र आव ०७७/०७८ मा चार सय ९६ जनाले झुण्डिएर आत्महत्या गरेका छन्। 

विष सेवन गरेर ६ सय ६, पानीमा हाम फालेर २०, आगो लगाएर १०, करेन्ट लगाएर ९, हाम फालेर ५, हातहतियार प्रयोग गरेर ४ र कर्तव्य गरी आत्महत्या एक जनाले गरेका छन्। 

मुलुकी अपराध संहिता लागू भएपछि सुदूरपश्चिममा एक सय नौ जना विरुद्ध आत्महत्या दुरुत्साहमा मुद्दा चलाएको प्रदेश प्रहरीले जनाएको छ।

प्रदेश प्रहरीका अनुसार आव ०७५/०७६ देखि ०७७/७८ सम्ममा एक सय नौ जना विरुद्ध आत्महत्या दुरुत्साहनमा मुद्दा चलाइएको छ। 

आव ०७५/०७६ मा २७, आव ०७६/०७७ मा ४१ र गत आर्थिक वर्षमा ४१ जना विरुद्ध आत्महत्या दुरुत्साहनमा मुद्दा चलाइएको हो।