मोरङका डेढ दर्जन क्षेत्रमा २२६ जनाको उम्मेदवारी, संघ र प्रदेश दुवैमा द्विपक्षीय प्रतिष्पर्धा

विराटनगर- आगामी मंसिर ४ गते हुने प्रदेश र प्रतिनिधिसभा सदस्य निर्वाचनका लागि मोरङमा २२६ जनाको उम्मेदवारी दर्ता भएको छ। प्रतिनिधिसभाका ६ वटा क्षेत्रमा १०८ जनाको उम्मेदवारी दर्ता भएको छ। 

प्रदेशसभाका १२ निर्वाचन क्षेत्रमा ११८ जनाको उम्मेदवारी दर्ता भएको प्रदेश निर्वाचन कार्यालय विराटनगरले जनाएको छ। प्रदेश र प्रतिनिधिसभामा गरी ७९ जनाको स्वतन्त्रबाट उम्मेदवारी दर्ता भएको छ। दुवै क्षेत्रमा गरी २१ जना महिलाको उम्मेदवारी दर्ता भएको छ। जसमा १२ जना प्रतिनिधिसभा र ९ जनाको प्रदेशसभामा उम्मेदवारी परेको निर्वाचन कार्यालयका प्रमुख लेवनकश्यप अधिकारीले जानकारी दिए। 

प्रदेश र प्रतिनिधिसभाका १८ वटा क्षेत्रमा मुख्यगरी द्विपक्षीय प्रतिष्पर्धा हुने देखिएको छ। मोरङमा सत्तारुढ कांग्रेस–माओवादी केन्द्र–एकीकृत समाजवादी र एमाले–जनता समाजवादी पार्टी (जसपा) बीच चुनावी तालमेल छ। दुई गठबन्धन बाहेक लोकतान्त्रिक समाजवादी पार्टी, राप्रपा, राष्ट्रिय स्वतन्त्र पार्टी, मंगोल नेशनल अर्गनाइजेसन लगायतका साना दलहरुले उम्मेदवारी दर्ता गराएका छन्। 

मोरङ-१
१५ जनाले उम्मेदवारी दिएको क्षेत्र नं. १ मा नेकपा एमालेका प्रदेश कमिटी सदस्य घनश्याम खतिवडा र नेपाली कांग्रेस मोरङका अध्यक्ष डिगबहादुर लिम्बुबीच मुख्य प्रतिष्पर्धा हुने छ। खतिवडा र लिम्बु संसदीय निर्वाचनमा तेश्रो पटक र २०४९ मा तत्कालिन लेटाङ गाविस अध्यक्षमा गरी चौथो पटक आमने सामने हुँदैछन्। गाविस अध्यक्षमा लिम्बुलाई पराजित गरेका खतिवडा २०७० को संविधानसभा निर्वाचनमा लिम्बुसँग पराजित भएका थिए। २०७४ को प्रतिनिधिसभा निर्वाचनमा खतिवडाले लिम्बुलाई पराजित गरेका थिए। दुवै उम्मेदवार एउटै साविक लेटाङ गाविकास हुन्। 

मोरङ २
१३ जनाले उम्मेदवारी दिएको क्षेत्र नं. २ मा एमाले मोरङका अध्यक्ष ऋषिकेश पोखरेल र कांग्रेस नेतृ सुजाता कोइरालाबीच मुख्य प्रतिष्पर्धा हुने छ। पोखरेल र कोइरालाबीच पहिलो पटक आमने सामने हुँदैछन्। २०७० को दोश्रो संविधानसभा निर्वाचनमा कांग्रेसका आमोद उपाध्यायलाई पराजित गरेका पोखरेल ०७४ को प्रतिनिधिसभा निर्वाचनमा कांग्रेसका डा. मिनेन्द्र रिजालसँग पराजित भएका थिए। तेश्रो पटक उम्मेदवार बनेका पोखरेल यस पटक कांग्रेस नेतृ कोइरालासँग प्रतिष्पर्धा गर्दैछन्। 

मोरङ ३

३१ जनाले उम्मेदवारी दिएको क्षेत्र नंं ३ मा एमाले स्थायी कमिटी सदस्य भानुभक्त ढकाल र कांग्रेस नेता डा. सुनिल शर्मा पुनः आमने सामने हुँदैछन्। ०७४ को प्रतिनिधिसभा निर्वाचनमा ढकालसँग पराजित भएका शर्मा यस पटक पुनः उनैसँग भिड्दैछन्। सो क्षेत्रमा राप्रपा उम्मेदवार रेखा थापाले पनि दुवैलाई टक्कर दिने स्थानीय मतदाताको भनाइ छ। 

मोरङ ४
१७ जनाले उम्मेदवारी दिएको क्षेत्र नं. ४ मा एमाले केन्द्रीय सदस्य विनोद ढकाल र माओवादी नेता अमनलाल मोदीबीच प्रतिष्पर्धा हुने भएको छ। एमालेसँगको गठबन्धनबाट मोदीले २०७४ को प्रतिनिधिसभा निर्वाचनमा कांग्रेसका महेश आचार्यलाई पराजित गरेका थिए। मंसिर ४ को निर्वाचनमा मोदी एमाले उम्मेदवारसँग मुख्य प्रतिष्पर्धामा छन्। 

मोरङ ५
१८ जनाले उम्मेदवारी दिएको क्षेत्र नं. ५ मा माओवादी केन्द्रका शिवकुमार मण्डल र जनता समाजवादी पार्टीका राजकुमार यादवबीच मुख्य प्रतिष्पर्धा हुने भएको छ। मण्डलले सत्तागठबन्धनबाट उम्मेदवारी दिएका छन् भने यादवले एमाले–जसपा गठबन्धनबाट उम्मेदवारी दिएका हुन्। यादव र मण्डल पुनः दोश्रो पटक आमने सामने हुँदैछन्। मण्डलले ०७४ को प्रतिनिधिसभा निर्वाचनमा कांग्रेसका अमृत अर्याललाई पराजित गर्दा यादव तेश्रो भएका थिए। सो क्षेत्रमा स्वतन्त्र उम्मेदवारी दिएका एमाले नेता योगेन्द्र मण्डलले पनि टक्कर दिन सक्ने आँकलन गरिएको छ। एमालेबाट सिफारिसमा परेका मण्डलले जसपासँगको गठबन्धनका कारण टिकट पाउन नसकेपछि स्वतन्त्र उम्मेदवारी दिएका हुन्। 

सो क्षेत्रबाट ०७४ मा एमालेका ज्ञानेश्वर राजवंशी निर्वाचित भएका थिए। १० जनाले उम्मेदवारी दिएको (ख) बाट नेपाली कांग्रेस केन्द्रीय सदस्य तथा संविधानसभा सदस्य अमृत अर्याल र जसपाका नेता तथा प्रदेश स्वास्थ्य मन्त्री जयराम यादवबीच मुख्यप्रतिष्पर्धा हुने भएको छ। अर्याल र यादव दोश्रो पटक आमने सामने हुदैछन्। ०६४ को उपनिर्वाचनमा यादवले अर्याललाई पराजित गरेका थिए। ०७४ मा यादव सोही क्षेत्रबाट निर्वाचित भएका थिए। 

मोरङ ६
१६ जनाले उम्मेदवारी दिएको क्षेत्र नं. ६ मा नेपाली कांग्रेसका नेता डा. शेखर कोइराला र नेकपा एमालेका स्थायी कमिटी सदस्य लालबाबु पण्डितका बीचमा मुख्य प्रतिष्पर्धा हुने भएको छ। कोइराला र पण्डित ५ वर्षपछि पुनः आमने सामने हुँदैछन्। ०७४ को प्रतिनिधिसभा निर्वाचनमा कोइरालालाई झिनो मतान्तरले पराजित गरेका पण्डित पुनः कोइरालासँग भिड्ने भएका हुन्। कोइराला ०६४ को उपनिर्वाचन र दोश्रो संविधानसभा निर्वाचनमा सोही स्थानबाट निर्वाचित भएका थिए।