कर्णालीमा मन्त्रीको शपथ : अदालतको आदेशको बर्खिलाप

सुर्खेत- उच्च अदालत सुर्खेतको आदेशविपरीत कर्णाली प्रदेशका प्रदेश प्रमुख तिलक परियारले मन्त्रीमा नियुक्त वीरबहादुर शाहीलाई शपथ दिलाएका छन्। मुख्यमन्त्री जीवनबहादुर शाहीको सिफारिसमा उद्योग, पर्यटन, वन तथा वातावरणमन्त्रीमा नियुक्त भएका  शाहीलाई प्रदेश प्रमुख परियारले आइतबार शपथ दिलाएका हुन्। 

मन्त्रिपरिषद् समावेशी नभएको भन्दै अदालतले पत्र निर्देशनात्मक आदेशसहितिको पत्र पठाएपछि शुक्रबार मन्त्री शाहीको सपथ रोकिएको थियो। उच्च अदालतले मन्त्रिपरिषद् पुनर्गठन गर्दा समावेशी सिद्धान्तलाई ध्यान नपु¥याएको भन्दै कर्णाली सरकारलाई पत्र लेखेको थियो। शाहीलाई नियुक्त गर्दा मन्त्रिपरिषद्‍मा महिलाको प्रतिनिधित्व नहुने भन्दै अधिकारकर्मीदेखि प्रदेश सभा सदस्यहरूले समेत आपत्ति जनाइरहेका छन्। 

मन्त्रीमा नियुक्त शाही डोल्पा जिल्लाबाट निर्वाचित सांसद हुन्। २०७८ माघ २३ मा पर्यटनमन्त्रीमा नियुक्त भएका हुम्लाका गैरसांसद छिरिङ डम्डुल लामा (कार्चेन)को ६ महिने पदावधि यही साउन २३ गते सकिएपछि शाहीलाई नियुक्त गरिएको हो। गैरसांसद व्यक्ति बढीमा ६ महिनासम्म मात्र मन्त्री बन्न पाउने व्यवस्था संविधानमा छ।