४१ जना कोरोना संक्रमित आईसीयूमा, पाँचको भेन्टिलेटरमा उपचार हुँदै

काठमाडौं– केही दिनयता कोरोना संक्रमितको संख्या बढ्दो क्रममा छ। स्वास्थ्य तथा जनसंख्या मन्त्रालयका अनुसार सोमबारमात्रै ८९५ जनामा कोरोना संक्रमण पुष्टि भएको छ।

मन्त्रालयका अनुसार ५ हजार ९०९ जनाको  परीक्षण गर्दा ८९५ मा संक्रमण पुष्टि भएको हो। ३ हजार ६५८ पीसीआर परीक्षणमा ६३२ जना र २ हजार २२४ एन्टिजेन परीक्षणमा २६३ जनामा संक्रमण पुष्टि भएको मन्त्रालयले बताएको छ।

पछिल्लो २४ घन्टामा २६४ जना संक्रमणमुक्त भएका छन् भने संक्रमणका कारण १ जनाको मृत्यु भएको छ। हाल देशभर कोरोनाका सक्रिय संक्रमितको संख्या ४ हजार ९३४ रहेको छ। मन्त्रालयका अनुसार संक्रमितमध्ये काठमाडौंमा ३७३, ललितपुरमा ६६, कैलालीमा २२ जना छन्।

संक्रमितको संख्या बढेसँगै अस्पतालका आईसीयू र भेन्टिलेटरमा रहेका संक्रमितको संख्या पनि बढिरहेको छ। अहिले ४१ जनाको आईसीयू र ५ जनाको भेन्टिलेटरमा उपचार भइरहेको छ।

प्रदेश १ मा २, बागमती प्रदेशमा ३२, गण्डकी प्रदेशमा १ र सुदूरपश्चिम प्रदेशमा १ जना आईसीयूमा उपचाररत छन्। यस्तै, बागमती प्रदेशमा ५ जनाको भेन्टिलेटरमा उपचार भइरहेको स्वास्थ्य मन्त्रालयले जनाएको छ।