विराटनगर- माेरङका चारवटा कुखुरा फार्ममा बर्डफ्लु भेटिएको छ। ग्रामथान, बुढीगंगा र कटहरी गाउँपालिकाका चारवटा कुखुरा फार्ममा बर्डफ्लु भेटिएको पुष्टि भएको हाे।
ग्रामथान–१ काे कृषि फार्ममा रहेका करिब ३ हजार ५०० लेयर्स कुखुरा मरेपछि नमूना परीक्षणका लागि पठाइएकाे थियो। कटहरी-७ काे पद्मश्री बहुउदेश्यीय कृषि फार्ममा रहेका दुई हजार बोइलरमध्ये ७ सय वटा कुखुरा मरेको र नमूना परीक्षण गर्दा बर्डफ्लु पुष्टि भएको बताइएकाे छ।
ग्रामथान गाउँपालिका–१ स्थित १ हजार २० वटा बोइलर कुखुरा रहेको श्रीगणेश कृषि फार्ममा पनि बर्डफ्लु पुष्टि भएकाे छ। बुढीगंगा–५ काे रास एग्रोभेट फार्ममा रहेका परेवासमेत मरेपछि त्यसको नमूना जाँच गर्दा बर्डफ्लु पुष्टि भएको बताइएको छ।
विराटनगरस्थित पशुपन्छी रोग प्रयोगशालामा गरिएको परीक्षणमा यी चार फार्ममा बर्डफ्लु पुष्टि भएको हो।
फ्लु देखिएका फार्मका कुखुरा तथा पन्छीजन्य वस्तु नष्ट गर्ने कार्य शुरू भएको प्रमुख जिल्ला अधिकारी दाहालले जानकारी दिए।
बर्डफ्लु फैलिएको फार्ममा रहेका पन्छीजन्य वस्तु नष्ट गर्न प्राविधिक टोली परिचालन गरिएको भेटनरी अस्पताल विराटनगरका डा.सुशीलकुमार अधिकारीले जानकारी दिए।
कुखुरा फार्महरुमा बर्डफ्लु पुष्टि भएपछि प्रमुख जिल्ला अधिकारी काशीराज दाहालको अध्यक्षतामा जिल्ला बर्डफ्लु नियन्त्रण समितिको बैठकले फार्महरुमासमेत निगरानी गर्न स्थानीय तहहरुलाई पत्राचार गर्ने निर्णय गरेको छ।
प्रदेश १ को भूमि व्यवस्था, कृषि तथा सहकारी मन्त्रालय र पशु सेवा विभागसँग रकम माग गर्ने समेत निर्णय गरेको बताइएको छ।
प्रकाशित: Jan 31, 2022| 15:19 सोमबार, माघ १७, २०७८
