स्यानिटरी प्याडमा लगाइएको कर फिर्ता लिन माग गर्दै प्रदर्शन [सात तस्बिरमा]

काठमाडौं– महिला अधिकार अभियन्ताहरूले स्यानिटरी प्याडमा लगाइएको कर फिर्ता लिन माग गर्दै राजधानीमा प्रदर्शन गरेका छन्। सरकारले स्वदेशी उद्योगलाई प्रोत्साहन गर्ने भन्दै गत वर्षदेखि स्यानिटरी प्याड आयातमा कर लगाएको थियो।

चालू आर्थिक वर्षको बजेटमार्फत त्यसमा कुनै हेरफेर नगरिए पनि विरोध भइरहेको छ। यसै क्रममा बुधबार वसन्तपुरमा प्रदर्शन गरिएको हो। प्रदर्शनकारीले सडक नाटकसमेत देखाएका थिए।

स्वदेशमा उत्पादन हुने भए पनि विदेशबाट समेत स्यानिटरी प्याड आयात भइरहेको छ। भन्सार विभागका अनुसार गत साउनमा चीनबाट २ लाख ५ हजार रुपैयाँ बराबरको ६ हजार १९९ थान (प्याकेट) स्यानिटरी प्याड आयात भएको छ। साउनमा भारतबाट ८ करोड ७७ लाख ३७ हजार रुपैयाँ बराबरको ९० लाख ३० हजार ५३५ थान प्याड आयात भएको छ।