सुदूरपश्चिमको ९ जिल्लामा साढे पन्ध्र करोडको पाठ्य पुस्तक बिक्री

समाज

गृहपृष्ठ
समाज

सुदूरपश्चिमको ९ जिल्लामा साढे पन्ध्र करोडको पाठ्य पुस्तक बिक्री

क्यापिटल नेपालबुधबार, वैशाख ३, २०८२

कैलाली। जनक शिक्षा सामग्री केन्द्र लिमिटेड प्रादेशिक कार्यालय धनगढीले १५ करोड ४७ लाख बराबरका पाठ्य पुस्तक बिक्री गरेको छ। केन्द्रले नयाँ शैक्षिक सत्र २०८२ का लागि सुदूरपश्चिम प्रदेशका नौवटै जिल्लामा स्थानीय पुस्तक विक्रेतामार्फत उक्त मूल्यका पाठ्य पुस्तक बिक्री गरेको हो।

गत चैत १७ गतेबाट पाठ्य पुस्तक बिक्री सुरु गरिएको र चैत मसान्तसम्म ११ लाख ३६ हजार ४१७ थान पाठ्य पुस्तक बिक्री भएको जनक शिक्षा सामग्री केन्द्र लिमिटेड प्रादेशिक कार्यालय धनगढीका प्रमुख रामविनय श्रेष्ठले जानकारी दिए।

प्रदेशमा चालु शैक्षिक सत्र २०८२ मा २५ करोड बराबरका १८ लाख १७ हजार थान पाठ्य पुस्तक बिक्री गर्ने लक्ष्य रहेको उनको भनाइ थियो।

प्रदेशका सात पहाडी जिल्लामा लगभग पाठ्य पुस्तक पुगिसकेको र केही छुटपिट ठाउँमा अझै पाठ्य पुस्तक गइरहेको उनले जानकारी दिए।

उनले भने, “हामीले सुरुमा पहाडी जिल्लामा पाठ्य पुस्तक बिक्री वितरण गरेका थियौँ। कैलाली र कञ्चनपुरका बाँकी रहेका ठाउँमा पाठ्य पुस्तक गइरहेको छ। भर्ना अभियानसँगै सबै जिल्लाका विद्यार्थीले पाठ्य पुस्तक पाउनु हुन्छ।”

केन्द्रले गत शैक्षिकसत्र २०८१ मा २२ करोड ५७ लाख बराबरका पा्ययपुस्तक बिक्री गरेको जनाएको छ।

प्रकाशित मिति: बुधबार, वैशाख ३, २०८२ १३:५२

प्रतिक्रिया दिनुहोस्