पूर्वउपराष्ट्रपति पुन सक्रिय राजनीतिमा फर्किंदा माओवादीमा उपाध्यक्ष संख्या पाँच पुग्याे

राजनीति

गृहपृष्ठ
राजनीति

पूर्वउपराष्ट्रपति पुन सक्रिय राजनीतिमा फर्किंदा माओवादीमा उपाध्यक्ष संख्या पाँच पुग्याे

क्यापिटल नेपालसोमबार, चैत २५, २०८१

काठमाडौं। नेकपा माओवादी केन्द्रबाट दुई कार्यकाल उपराष्ट्रपति बनेका नन्दबहादुर पुन पासाङ पार्टी राजनीतिमा सक्रिय भएका छन्।

नेकपा माओवादी केन्द्रको गत चैत १८ र १९ को पदाधिकारी बैठकले पुनलाई एकै पटक केन्द्रीय सदस्य, स्थायी समिति सदस्य र उपाध्यक्षमा मनोनीत गरेको हो। उपाध्यक्ष बन्न केन्द्रीय सदस्य र स्थायी समिति बन्नुपर्ने भएकाले एकै बैठकबाट दुई पद दिइएको हो।
गत माघमै पुन पार्टी राजनीतिमा औपचारिक रूपमा फर्किएका थिए। सोहीअनुसार पार्टीले पासाङलाई विशेष जिम्मेवारी भन्दै आर्थिक उत्पादन संयन्त्रको इन्चार्ज बनाएको थियो।

उपराष्ट्रपतिको कार्यकाल सकिएसँगै उनी अनौपचारिक रूपमा माओवादीको आन्तरिक बैठकमा सहभागी हुँदै आएका थिए। अब भने उनी पदाधिकारीको थप जिम्मेवारीसहित पार्टी राजनीतिमा सक्रिय हुने भएका हुन्। पुनलाई उपाध्यक्ष बनाइए पनि वरीयता खुलाइएको छैन।

माओवादीमा कृष्णबहादुर महरा, पम्फा भुसाल, अग्निप्रसाद सापकोटा पनि उपाध्यक्ष नै हुन्। गत पुसको केन्द्रीय समिति बैठकमा पनि नन्दबहादुर आमन्त्रित हैसियतमा माओवादी केन्द्रीय समिति बैठकमा सहभागी थिए।

उनी सक्रिय राजनीतिमा आउन नमिल्ने भन्दै पार्टीभित्रै विरोध थियो। भूमिगत अवस्थामा माओवादी जनयुद्धकालका डेपुटी कमान्डर नन्दबहादुर माओवादी शान्ति प्रक्रियामा आएपछि सेना समायोजनमा नगएर राजनीतिमा आएका थिए। उनी २०७२ मा उपराष्ट्रपतिमा निर्वाचित भएका थिए।

प्रकाशित मिति: सोमबार, चैत २५, २०८१ ०७:००

प्रतिक्रिया दिनुहोस्