काठमाडौं। लगातार चौथो दिन पनि सेयर बजारमा गिरावट आएको छ। साताको कारोबारको अन्तिम दिन बिहीबार सेयर बजार सूचक नेपाल स्टक एक्सचेञ्ज (नेप्से) २.७० अंकले घटेर २८१८.४३ बिन्दुमा रोकिएको हो।
अघिल्लो कारोबार दिन बुधबार पनि नेप्से २५.१६ अंकले घटेर २८२१.१३ बिन्दुमा रोकिएको थियो भने मंगलबार ३०.३६ र सोमबार १३.६२ अंकले घटेको थियो।
सोमबार अघिका नौ कारोबार दिन भने नेप्से लगातार बढ्दै २१२ अंकले उकालो लागेको थियो।
बिहीबार नेप्सेमा कुल १० अर्ब १० करोड रुपैयाँ बराबरको कारोबार भएको छ। बुधबार भने नेप्सेमा कुल १० अर्ब ९७ करोड रुपैयाँ बराबरको कारोबार भएको थियो।
तर, मंगलबार नेप्सेमा १२ अर्ब ९४ करोड, सोमबार १४ अर्ब २८ करोड र आइतबार १४ अर्ब २५ करोड रुपैयाँ बराबरको कारोबार भएको थियो।
बिहीबार कारोबारमा आएकामध्ये ९९ कम्पनीको सेयर मूल्य बढ्दा १३२ कम्पनीको घटेको छ। यस्तै, १२ कम्पनीको सेयर मूल्य भने स्थिर छ।
बिहीबार भुगोल इनर्जी डेभलपमेन्ट कम्पनी र गार्डियन माइक्रोलाइफ इन्स्योरेन्सको सेयर मूल्यमा सकारात्मक सर्किट लाग्दा उपकार लघुवित्त वित्तीय संस्था र राप्ती हाइड्रो एन्ड जेनेरल कन्ट्रक्सनको सेयर मूल्य नौ प्रतिशत बढीले वृद्धि भएको छ।
बिहीबार बैंकिङ समूहको सेयर मूल्य ०.०३ प्रतिशत, विकास बैंक समूहको १.८६ प्रतिशत, उत्पादन समूहको ०.२४ प्रतिशत र लघुवित्त समूहको सेयर मूल्यमा ०.०५ प्रतिशतको वृद्धि भएको छ।
फाइनान्स समूहको मूल्य ०.२३ प्रतिशत, होटल तथा पर्यटन समूहको ०.५७ प्रतिशत, जलविद्युत् समूहको ०.०६ प्रतिशत र लगानी समूहको सेयर मूल्य ०.१४ प्रतिशतले घटेको छ।
यस्तै, जीवन बिमा समूहको सेयर मूल्य ०.८० प्रतिशतले घट्दा निर्जीवन बिमा समूहको ०.०४ प्रतिशत र व्यापार समूहको सेयर मूल्यमा ०.२४ प्रतिशतको गिरावट आएको छ।
-1741480500.jpg)
