काठमाडौं। सरकारले श्रम–सुशासनका क्षेत्रमा लागू गरेका नीतिगत, कानुनी तथा प्रक्रियागत विषयमा यूएईको राजधानी अबुधाबीस्थित नेपाली दूतावासले श्रमिकलाई सचेतना कार्यक्रम सञ्चालन गरेको छ।
सामाजिक सुरक्षा कोषमा श्रमिकको आबद्धता, प्रक्रिया, नेपाली दूतावास अबुधाबी, नेपाली समाज युएई र गैरआवासीय नेपाली संघ, एनसीसी युएईलगायतका संघ–संस्थाको सहयोगमा उक्त अभिवृद्धि कार्यक्रम सञ्चालन गरिएको हो।
अबुधाबीदेखि तीन सय किलोमिटर पूर्वमा रहेको उजारेखमा घुम्ति शिविरमार्फत श्रमिक सचेतना तथा राहदानी एवं कन्सुलर कार्यक्रम सञ्चालन गरिएको दूतावासले जनाएको छ।
शिविरमा तीन सयभन्दा बढी नेपालीलाई नेपाल तथा युएईका विद्यमान श्रम कानुनका विषयमा अद्यावधिक जानकारी गराइएको थियो।
कार्यक्रममा औपचारिक माध्यमबाट विप्रेषण पठाउँदा प्राप्त हुने फाइदा, नेपाली राजदूतावास, युएईबाटै पुनः श्रम स्वीकृति उपलब्ध गराउनेसम्बन्धी व्यवस्था र वित्तीय साक्षरतालगायतका विविध विषयमा सचेतनामूलक जानकारी दिइएको थियो।
घुम्ती शिविरमा फुजैरहा इमिरेट्स र सोको आसपास रहेका २१६ नेपालीको राहदानी नवीकरण गरिएको दूतावासबाट विज्ञप्तिमा उल्लेख छ।
यूएईमा कार्यरत नेपालीको संख्या करिब ६ लाख रहेको र आउने क्रम निरन्तर बढिरहेको अवस्थामा दूतावासले नेपालीको सेवा र सुविधालाई लक्षित गरेर स्रोतसाधनले भ्याएसम्म सेवा दिँदै आएको जनाएको छ।
गत आर्थिक वर्षमा यस नियोगबाट ४६ हजार चार सय राहदानी जारी भएकामा चालू आर्थिक वर्षको माघ मसान्तसम्म ३० हजार नेपालीको राहदानी जारी भइसकेको छ।
राहदानीको म्याद समाप्त भइसकेका, भिसाको म्याद समाप्त भइसकेका र राहदानी हराई समस्यामा परेका व्यक्तिको दूतावासले प्राथमिकताका साथ राहदानी नवीकरण गर्ने गरेको जनाएको छ।
