काठमाडौं। दुई वटा नागरिकता कीर्ते प्रकरणमा प्रहरीको केन्द्रीय अनुसन्धान ब्युरो (सिआईबी)को अनुसन्धानपछि फरार रहेका ठुङ्गरम ग्यालटुल शेर्पाले हदबन्दीमा रहेको जग्गा अवैध रूपमा बिक्री गरेको पाइएको छ।
ललितपुरको लामाटारमा रहेको टुङ्गरम इन्टरनेशनल एकेडेमी (टिआईए) विद्यालयको नाममा रहेको १४० रोपनी जग्गामध्ये २१ रोपनी हदबन्दीको जग्गा दुई वटा कम्पनीलाई बिक्री गरेका थिए। सोही कारण उनी अख्तियार दुरुपयोग अनुसन्धान आयोगको छानबिनमा पर्नुका साथै मालपोत कार्यालयका कर्मचारीसमेत अनुसन्धानको दायरामा आएका छन्।
ठगीको चलाखी मालपोतमा पत्ता लाग्यो
ठुङ्गरमले २०८० भदौ २२ गते विद्यालयको सञ्चालक समितिको एकल निर्णयमार्फत शिला डेभलपर्स (बूढानीलकण्ठ) र ध्यान भिल्लाज (बूढानीलकण्ठ) नामक कम्पनीलाई २१ रोपनी जग्गा बिक्री गर्ने निर्णय गरे। सोही आधारमा उनले मालपोत कार्यालयमार्फत जग्गा नामसारीसमेत गराए।
तर, उनले पुनः मोदिता डेभलपर्स नामक अर्को कम्पनी खडा गरी त्यही २१ रोपनी जग्गा नामसारी गर्ने प्रयास गरेपछि मालपोत कार्यालयले उनको चलाखी र ठगी पत्ता लगाएको हो।
अवैध कारोबारको खुलासा
ठुङ्गरमले एकै जना व्यक्तिको नाममा छुट्टै-छुट्टै गरी एउटै जग्गा पटक-पटक पास गराएका थिए। उनले यस क्रममा राजस्व तिरेको देखाउँदै कागजात तयार गरे। जब उनले मोदिता डेभलपर्सको नाममा पुनः नामसारी गर्न खोजे, ललितपुर मालपोत कार्यालयका प्रमुखले सो जग्गा हदबन्दीमा परेको देखेपछि प्रक्रिया रोकिदिए।
सुरुमा विद्यालयको नामबाट कम्पनीमा नामसारी गर्दा पनि उक्त जग्गा हदबन्दीमै थियो। तर, ४० लाख रुपैयाँको भ्रामक कारोबार देखाउँदै १४० रोपनी जग्गा विद्यालयको नाममा किनेको प्रमाण पेश गरिएको थियो।
त्यसपछि नेपाल सरकारको स्वीकृतिमा मन्त्रिस्तरीय निर्णय गरेर २८ रोपनी जग्गा मात्रै बिक्री गर्न अनुमति दिइएको थियो। किनभने ३० रोपनीभन्दा कम मात्र बिक्री गर्न पाइन्छ। त्यसैले बाँकी जग्गा हकबन्दी लगाएर रोक्का गरिएको थियो।
तर, ठुङ्गरमले नियम उल्लंघन गर्दै हकबन्दी लगाइएको २१ रोपनी जग्गा अवैध रूपमा बिक्री गरिसकेका थिए। मालपोत कार्यालयका स्रोतका अनुसार उनले राजस्व तिरेको देखाएर नक्कली भौचर तथा कागजातको आधारमा मालपोत कार्यालयबाट पास गराएका थिए।
अख्तियारको छानबिन र ठुङ्गरमको दबाब
जग्गा पुनः अर्को कम्पनीमार्फत नामसारी गर्न खोज्दा मालपोत कार्यालय प्रमुखले कम्प्युटर प्रणालीमा जग्गा रोक्का रहेको देखेपछि सो फाइल अख्तियार दुरुपयोग अनुसन्धान आयोगमा पठाए। मालपोत स्रोतका अनुसार कार्यालय प्रमुखले पहिला बदमासी गरेको भए पनि पछि आफू जोगिन अख्तियारलाई जिम्मा लगाएको देखिन्छ। अख्तियारले छानबिन सुरु गरिसकेको छ। केही मालपोत कर्मचारीको बयानसमेत लिइसकेको छ।
तर, ठुङ्गरमले अख्तियारका आयुक्त सुमित्रा अमात्यमार्फत मिलाउन प्रयास गरेको स्रोतले बताएको छ। उनले २८ रोपनी जग्गा बिक्री गर्दा आफ्नो साझेदार कर्मा शेर्पाले बदमासी गरेको भन्दै निवेदनसमेत दिएका थिए। तर, अख्तियारले कर्मासँग कुनै स्पष्टीकरण मागेको छैन। कर्माले जग्गा बिक्री प्रक्रियाका सबै सक्कली कागजात र प्रमाण अख्तियारलाई बुझाइसकेका छन्।
तर, २१ रोपनी जग्गा अवैध रूपमा बिक्री गर्न संलग्न रहेको आशंकामा अख्तियारले ठुङ्गरम र मालपोतका कर्मचारीलाई पटक-पटक स्पष्टीकरण मागिरहेको छ ।
