काठमाडौं। विश्वभर प्रेमी-प्रेमिकाले आपसमा माया साटासाट गर्ने पर्व हो, भ्यालेन्टाइन डे (प्रणय दिवस)। यो पर्व पादरी सेन्ट भ्यालेन्टाइनको वलिदानसँग सम्बन्धित छ।
तत्कालीन रोमन सम्राट क्लाउडियस द्वितीयले युवा प्रेम र विवाहमा लागे सैनिक सेवा प्रभावित हुने भन्दै प्रतिबन्ध लगाएका थिए। तर, भ्यालेन्टानले राजाको निर्णयविपरीत प्रेम र विवाहका लागि प्रेरित गर्दै युवायुवतीका जोडी तयार पारेर सार्वजनिक स्थलमा सामूहिक विवाह कार्यक्रम गराउँथे।
भ्यालेन्टाइनले आफ्नो आदेश तोडेको आरोपमा उनलाई ई.पू. २७० को फेब्रुअरी १४ मा राजाले मृत्युदण्ड दिए। प्रेमका लागि प्राण त्याग गर्ने पादरीको सम्झनामा भ्यालेन्टाइन डे मनाउन थालिएको हो।
लामो समयदेखि उनकै सम्झनामा हरेक वर्ष फेब्रुअरी महिनाको एक साता प्रणय दिवस मनाउने प्रचलन रही आएको छ। यो समयमा रोज डे, प्रोपोज डे, चकलेट डे, टेडी डे, प्रोमिस डे, हग डे र ‘भ्यालेनटाइन डे’ मनाइन्छ।
भ्यालेनटाइन डे सुरु भएसँगै रातो गुलाफको फूल आदान-प्रदान गर्ने प्रचलन अत्याधिक रहँदै आएको छ। हरेक वर्ष नेपालमा उत्पादन भएको गुलाफको फूलले माग धान्न नसक्दा भारतबाट ठूलो मात्रामा फूल आयात हुँदै आएको थियो।
तर, यो वर्ष फूलको केन्द्र मानिने काठमाडौंको कमलादीका पसलहरू सुनसान भएका छन्। व्यापारीका अनुसार, आर्थिक मन्दीले प्रेम दिवसको व्यापारमा प्रभाव पारेको छ।
व्यापार कमबारे व्यवसायी भन्छन्, ‘नेपालमै फूल उत्पादन भए पनि माग धान्न भारतबाट आयात गर्नुपर्छ। जसले गर्दा मूल्य बढेको छ। यो वर्ष राम्रो व्यापार हुन सकेको छैन।’
हाल गुलाफको फूल प्रतिगोटा १०० देखि १५० रुपैयाँसम्म पर्ने भएको छ। गुलाफको बुके २ हजारसम्म हुँदा फूलहरूको ५०० देखि १५ सय रुपैयाँसम्ममा बिक्री हुँदै आएको छ।
