आफ्नै चुनावी क्षेत्रमा सहकारी ठगी आरोपमा रवि लामिछानेविरुद्ध मुद्दा दायर

सहकारी

गृहपृष्ठ
सहकारी

आफ्नै चुनावी क्षेत्रमा सहकारी ठगी आरोपमा रवि लामिछानेविरुद्ध मुद्दा दायर

क्यापिटल नेपालमंगलबार, माघ २२, २०८१

काठमाडौं। राष्ट्रिय स्वतन्त्र पार्टी (रास्वपा) सभापति रवि लामिछानेविरुद्ध चितवन जिल्ला अदालतमा मुद्दा दायर भएको छ। सहारा सहकारीको बचत हिनामिना गरेको आरोपमा उनीविरुद्ध मुद्दा दर्ता भएको हो।

लामिछानेसहित ३२ जनाविरुद्ध ठगी तथा संगठित अपराधको कसुरमा अदालतमा मुद्दा दर्ता गरिएको छ। मंगलबार सरकारी वकिल कार्यालय चितवनले उनीहरूविरुद्ध सहारा चितवन बहुउद्देश्यीय सहकारी संस्था ठगी तथा संगठित अपराध कसुरमा अदालत मुद्दा दर्ता गरेको हो।

यसअघि जिल्ला प्रहरी कार्यालय चितवनले अनुसन्धान गरी प्रतिवेदन र प्रमाणहरू पेश गरेको थियो। उनीहरूविरुद्ध ३८ करोड ९ लाख रुपैयाँ बिगो दाबी गरिएको अदालतले जनाएको छ। अनुसन्धानबाट गोरखा मिडियासहितका कम्पनीमा ४३ करोड १४ लाख ९९ हजार ९२८ रुपैयाँ अपचलन भएको देखिएको हो।

यसअघि लामिछानेलाई पोखराको सूर्यदर्शन सहकारी ठगी प्रकरणमा कास्की जिल्ला अदालतले ६५ लाख, स्वर्णलक्ष्मी सहकारी ठगी प्रकरणमा काठमाडौं जिल्ला अदालतले ६० लाख र बुटवलको सुप्रिम सहकारी ठगी प्रकरणमा जिल्ला अदालत रुपन्देहीमा १ करोड रुपैयाँ धरौटी बुझाएर रिहा भएका छन्।

गत आम निर्वाचनमा लामिछाने चितवन क्षेत्र नम्बर २ बाट निवार्चित भएका थिए। दोहोरो नागरिकता लिएको आरोपमा सांसद पद गुमाएका उनले उपनिर्वाचनमा सर्वाधिक मत ल्याएर पुनः विजयी भएका थिए।

प्रकाशित मिति: मंगलबार, माघ २२, २०८१ १५:०७

प्रतिक्रिया दिनुहोस्