उपमहानगरद्वारा ६ महिनामा १९ करोड राजस्व संकलन

अर्थतन्त्र

गृहपृष्ठ
अर्थतन्त्र

उपमहानगरद्वारा ६ महिनामा १९ करोड राजस्व संकलन

क्यापिटल नेपालमंगलबार, माघ ८, २०८१

काठमाडौं। मकवानपुरको हेटौंडा उपमहानगरले आर्थिक वर्ष २०८१/८२ को छ महिनामा १९ करोड ७४ लाखभन्दा बढी राजस्व संकलन गरेको छ।

उपमहानगरको राजस्व शाखाका प्रमुख मनोज सुवेदीका अनुसार चालु आवको साउनदेखि पुससम्ममा उपमहानगले विभिन्न शीर्षकमा १९ करोड ७४ लाख ३७ हजार ९९३ राजस्व संकलन गरेको छ। यो अघिल्लो आव २०८०/८१ को सो अवधिको तुलनामा संकलन गरेको भन्दा तीन करोड १२ लाख बढी हो।

चालु आवको ६ महिनामा सम्पत्ति करबाट चार करोड ९४ लाख ६१ हजार, घरबहाल करबाट दुई करोड ८१ लाख ७३ हजार, नक्सापास दस्तुरबाट दुई करोड ७६ लाख ६५ हजार, पूर्वाधार सेवाको उपयोगमा लाग्ने करबाट दुई करोड १८ लाख ७५ हजार, सिफारिस दस्तुरबाट एक करोड ६२ लाख ८३ हजार, बहाल बिटोरी करबाट एक करोड ३३ लाख ९२ हजार, व्यवसाय करबाट एक करोड ८३ लाख ११ हजार राजस्व संकलन भएको प्रमुख सुवेदीले जानकारी दिए।

अघिल्लो आव २०८०र८१ को सो अवधिमा उपमहानगरले १६ करोड ६२ लाख ८६ हजार राजस्व संकलन गरेको थियो। बाँकी बक्यौता असुलीमा गरिएको कडाइ, करको दर र दायरा दुवैमा भएको वृद्धि, नक्सा अभिलेखीकरण तथा आन्तरिक आयस्रोतमा भएको वृद्धिलगायत कारणले चालु आवको ६ महिनामा राजस्व संकलनमा वृद्धि भएको प्रमुख सुवेदीको भनाइ छ।

प्रकाशित मिति: मंगलबार, माघ ८, २०८१ ११:३६

प्रतिक्रिया दिनुहोस्