आईपीओ आवेदनमा नयाँ रेकर्ड

काठमाडौं– ज्योति लाइफ इन्स्योरेन्सको आईपीओमा आवेदनको नयाँ रेकर्ड कायम भएको छ। उक्त कम्पनीको आईपीओका लागि १८ लाखभन्दा बढीले आवेदन दिएका छन्।

उक्त इन्स्योरेन्सको आईपीओमा १८ लाख ४ हजार ६४८ जना आवेदकबाट ३ करोड ८० लाख ५७ हजार ७१० कित्ता आईपीओ खरिदको लागि आवेदन परेको छ। यो संख्या सर्वसाधारणलाई निष्काशनमा ल्याएको ५९ लाख ४० हजार कित्ताको करिब साढे ६ गुणा बढी हो।

कम्पनीले फागुन २१ गतेदेखि कम्पनीले कुल जारी पूँजीको ३० प्रतिशत अर्थात् ६६ करोड रुपैयाँ बराबरको ६६ लाख कित्ता सेयर निष्काशनमा ल्याएको छ।

त्यसमध्ये ५ प्रतिशत अर्थात् ३ लाख ३० हजार कित्ता कर्मचारीहरुलाई र अर्को ५ प्रतिशत अर्थात् ३ लाख ३० हजार कित्ता सामूहिक लगानी कोषहरुलाई सुरक्षित गरी बाँकी ५९ लाख ४० हजार कित्ता सेयर सर्वसाधारणको लागि निष्काशनमा ल्याएको हो।

हाल कम्पनीको अधिकृत पूँजी ३ अर्ब, जारी पूँजी २ अर्ब २० करोड र चुक्ता पूँजी एक अर्ब ५४ करोड रुपैयाँ छ। सर्वसाधारणलाई आईपीओ निष्काशनपछि कम्पनीको चुक्ता पूँजी २ अर्ब २० करोड रुपैयाँ पुग्नेछ।