तुइन तर्दा हरेक वर्ष ज्यान गुमाउँछन् व्यासबासी

धनगढी– महाकाली नदी तर्ने क्रममा तुइनबाट खसेर बेपत्ता भएका दार्चुलाको व्यास गाउँपालिका–२ मालका ३३ वर्षीय जयसिंह धामीको अवस्था चार दिनसम्म पनि अज्ञात छ। गएको शुक्रबार भारतीय सीमा सुरक्षा बल (एसएसबी) ले तुइनको डोरी काटिदिएपछि जयसिंह नदीमा खसेका थिए।

दुई साताअघि पनि सोही वडाका २६ वर्षिय धनसिंह धामी मालघाटमै तुइन तर्ने क्रममा महाकाली नदीमा खसेका थिए। तुइन सञ्चालक कल्याणसिंह धामीले भने, ‘उनी ताम्लो नबाँधी तुइनबाट बस्तीमा आउँदै थिए। त्यही लापरबाहीका कारण नदीमा खसे तर, पौडी खेल्न आउने भएकाले बचे।’

पछिल्लो समय दैनिक रुपमै एसएसबीले तुइन हटाउँदै आएको कल्याणसिंहले बताए। वडा नम्बर २ स्थित मालघाटमा तुइन सञ्चालन गरिरहेका धामीले भने, ‘मेरो घाटमा सञ्चालन भएको तुइनमा भारतीय पक्षले डोरी काट्दा मानिस बेपत्ता नै भएको चाहिँ यो पहिलो घटना हो।’

भारतीय पक्षले धार्चुला–लिपुलेक सडक एकलौटी रुपमा निर्माण गर्न लागेपछि सो वडामा गस्ती बढेको छ। व्यास गाउँपालिका–२ का वडाध्यक्ष गणेशसिंह धामीले हरेक वर्ष तुइन तर्ने क्रममा एक जनाले ज्यान गुमाउनुपरेको बताए। ‘यहाँ तुइनको सहाराले नेपालका अन्य जिल्ला प्रवेश गर्नुपर्ने बाध्यता छ। २०५० सालदेखि हालसम्मको तथ्यांक निकाल्दा तुइनका कारण २६ जनाको मृत्यु भएको छ।’ 

वडाध्यक्ष धामीले भने, ‘भारतीय पक्षले गस्ती बढाएपछि चार वर्षमा चार जनाले ज्यान गुमाएका छन्। यो मेरो वडाको मात्र तथ्यांक हो। वडा नम्बर ४ मा पनि समस्या यस्तै छ।’

बेपत्ता जयसिंहका भाइ नरेन्द्र धामीले एसएसबीको ज्यादती धेरै पहिलेदेखि नै नेपालीले भोग्दै आएको बताए। 'सो बाटो भएर नदी तर्नुपर्ने हाम्रो बाध्यता छ। एसएसबीले नेपालीप्रति अमानवीय व्यवहार देखाउँदै आएको छ। हामी त्यो सहेर जोखिम मोल्दै तुइन तर्ने गरेका छौं। अहिले त निर्दोष व्यक्तिले बाटो हिँडेकै कारण ज्यान गुमाउनपर्ने अवस्था आयो।’