दोधारा चाँदनी मुलुककै ठूलो आर्थिक नाका बन्नेगरी काम भइरहेकाे छ : मन्त्री साउद

पूर्वाधार

गृहपृष्ठ
पूर्वाधार

दोधारा चाँदनी मुलुककै ठूलो आर्थिक नाका बन्नेगरी काम भइरहेकाे छ : मन्त्री साउद

क्यापिटल नेपालआइतबार, मंसिर ३, २०८०

महेन्द्रनगर। परराष्ट्रमन्त्री एनपी साउदले कञ्चनपुरको दोधारा चादँनी नाका सुदूरपश्चिमको मात्र नभइ मुलुकको आर्थिक नाकाका रुपमा विकास हुनेगरी काम अघि बढेको बताएका छन्।

कञ्चनपुर उद्योग वाणिज्य संघले आइतबार आयोजना गरेको कार्यक्रमलाई सम्बोधन गर्दै उनले दोधारा चाँदनी सुख्खा बन्दरगाह प्रक्रिया अघि बढ्नुका साथै महाकाली नदीमा चार लेनको पक्की पुल निर्माण भइसकेको बताए।

'भारतीय पक्षले पनि सोहीअनुसार भारततर्फ पनि काम अघि बढाएको छ,’ मन्त्री साउदले भने 'कञ्चनपुर आर्थिक, पर्यटकीयलगायत धेरै ज्यादा सम्भावना बोकेको क्षेत्र हो।’ दोधारा चाँदनी नाका तीव्र गतिमा खुल्नेगरी काम अघि बढेको जनाउँदै उनले बनबासा पुलमा अवागमन सहज बनाउनेदेखि विदेशी पर्यटकलाई नाकामा आउनजान सहज गर्ने विषयमा पहल गर्ने बताए।

'यो मानशखण्ड क्षेत्रको विकासमा योजना बनाएर नेपाल/भारत पर्यटकीय संयन्त्रको विकास गर्नेगरी काम अघि बढेको छ।’ उनले भने, 'भारतको पूर्णागिरी र डडेल्धुराको परशुरामधाम क्षेत्र जोड्न महाकाली नदीमा पुल बनाउने विषयमा पनि भारतीय पक्षसित निरन्तर समन्वय भइरहेको छ।’

कार्यक्रममा कञ्चनपुर उद्योग वाणिज्य संघका अध्यक्ष, पूर्व पदाधिकारी, व्यापारी तथा व्यवसायीले सीमा समस्या, यहाँको पर्यटकीय तथा उद्योगिक क्षेत्रको विकास, व्यापारी तथा व्यवसायीका समस्या लगायतका विषयमा धारणा राखेका थिए।

प्रकाशित मिति: आइतबार, मंसिर ३, २०८० १२:३९

प्रतिक्रिया दिनुहोस्