भेरी बबई डाइभर्सनको सिभिल निर्माण सुरु, ४ वर्षमा बिजुली उत्पादन र सिंचाइ हुने

पूर्वाधार

गृहपृष्ठ
पूर्वाधार

भेरी बबई डाइभर्सनको सिभिल निर्माण सुरु, ४ वर्षमा बिजुली उत्पादन र सिंचाइ हुने

हरिप्रसाद शर्मामंगलबार, कात्तिक ५, २०७६

काठमाडौं । भेरी बबई डाइभर्सन बहुउद्धेशिय परियोजनाको बाँध र विद्युतगृह निर्माणका लागि सिभिल ठेकेदार परिचालन भएको छ । चीन र नेपालको गोनवनान/रमन जेभीले निर्माण सुरु गरेका छन् । बाँके र वर्दियामा थप ५० हजार हेक्टर जमिन सिँचाइ गर्नुका साथै ४८ मेगावाट बिजुली उत्पादन गर्ने लक्ष्यअनुसार ठेकेदार कम्पनीले काम सुरु गरेको हो ।

४ वर्षमा आयोजना सम्पन्न भई सिंचाइका अतिरिक्त बिजुली उत्पादन हुने आयोजना निर्देशक सञ्जिव बरालले जानकारी दिए । बरालका अनुसार, विद्युत आयोजनाअन्र्तगत हाइड्रो मेकानिकलतर्फका लागि ठेकेदार चयन अन्तिम चरणमा पुगेको छ । यस्तै इलेक्ट्रो मेकानिकलको केही समयपछि हुने उनले बताए । अहिले भेरी नदीमा बाँध र विद्युतगृह निर्माण गर्ने काम अघि बढेको उनले बताए ।

अहिले आयोजना निर्माणका लागि परामर्शदाता छनौट भइसकेको छ । पहिलो पटक टनेल बोरिङ (टीबीएम) उपकरणको प्रयोग गरी गत बैशाखमा सुरुङमार्गको ब्रेक थ्रु गरिएको थियो । १२ किलोमिटर लामो सुरुङमार्ग निर्धारित समयभन्दा एक वर्षअघि सम्पन्न भएको थियो । सुरुङको काम सकिए पनि पानी प्रवाह गर्नका लागि भेरी नदीमा बाँध र ववइमा विद्युतगृहको काम अघि बढन सकेको थिएन । दोस्रो चरणअन्तर्गत बाँध, विद्युत गृह र सिँचाइका थप संरचना बनाउन थप १६ अर्ब रुपैयाँ लाग्ने अनुमान गरिएको छ ।

सुर्खेतकोे भेरीगङ्गा नगरपालिकास्थित चिप्लेमा १५ मिटर अग्लो बाँध बनाएर सुरुङमार्फत प्रतिसेकेन्ड ४० घनमिटर भेरीको पानी बबईमा खसालिने आयोजनाको लक्ष्य छ । भेरीको पानी सुर्खेत र बर्दियाको सिमानास्थित बबई नदीमा खसालेर ४८ मेगावाट विद्युत उत्पादनसँगै बाँके र बर्दियाको खेतीयोग्य जमिनमा सिँचाइ पु¥याइनेछ । सुर्खेतको चिप्लेस्थित भेरी नदीमा बाँध, विद्युत उत्पादन गर्न विद्युत गृह बनाइनेछ ।

२०६८ सालबाट आयोजना औपचारिक रुपमा अघि बढेपछि पछि राष्ट्रिय गौरवका आयोजनाको सूचीमा राखेर निर्माण अघि बढाइएको थियो । विद्युतगृह जनताको जलविद्युतमा परेको छ । आयोजनाबाट उत्पादन हुने बिजुली बेच्ने र आयोजना सञ्चालको खाका तयार भएको छैन । एउटा नदीको पानी अर्को नदी बेसिनमा खसालेर सिंचाई र विद्युत उत्पादन गर्ने भेरी बबइ पहिलो परियोजना हो ।

प्रकाशित मिति: मंगलबार, कात्तिक ५, २०७६ १३:४४

प्रतिक्रिया दिनुहोस्