कोरोना संक्रमणबाट मृत्यु हुनेको संख्या दुई पुग्यो

काठमाडौं- नेपालमा कोरोना भाइरस (कोभिड-१९)को संक्रमणबाट थप एक जनाको ज्यान गएको छ। स्वास्थ्य तथा जनसंख्या मन्त्रालयले बाँकेको क्वारेन्टिनमा ज्यान गुमाएका युवकमा कोरोना संक्रमण पुष्टि भएको जनाएको छ।

भारतबाट आई क्वारेन्टिनमा बसेका युवकको बान्ता भई मृत्यु भएको थियो। उनको मृत्युपछि स्वाब संकलन गरी परीक्षण गरिएकोमा रिपोर्ट पोजिटिभ आएको मन्त्रालयका प्रवक्ता डा. विकास देवकोटाले जानकारी दिए।

उनका अनुसार भेरी अस्पतालमा गरिएको परीक्षणमा युवकमा कोरोना भाइरसको संक्रमण पुष्टि भएको हो। योसँगै नेपालमा कोरोनाबाट मृत्यु हुनेको संख्या दुई पुगेको छ ।