कांग्रेस केन्द्रीय समिति : उपनिर्वाचनको प्रतिवेदन पेश, पौडेल समूहसँग छलफल जारी

काठमाडौं- प्रमुख प्रतिपक्षी दल नेपाली कांग्रेसको आइतबारको केन्द्रीय समिति बैठकमा उपनिर्वाचन सम्बन्धी प्रतिवेदन पेस भएको छ।

उपनिर्वाचन समितिले निर्वाचनको परिणाम, असहयोग तथा समीक्षा समेटेर प्रतिवेदन तयार पारेको छ। उक्त प्रतिवेदनमाथि सोमबारबाट छलफल हुनेछ।

यसैगरी, धनुषाको महेन्द्रनगरमा भएको बम विस्फोटको घटनाको छानविन गर्न र उचित क्षतिपूर्तिको व्यवस्थाका लागि बैठकमा केन्द्रीय सदस्य महेन्द्र यादवले कुरा उठाएका थिए। सो, विषय सर्वसम्मपतिले पारित पनि भएको छ।

यादवका अनुसार वरिष्ठ नेता रामचन्द्र पौडेल र कृष्णप्रसाद सिटौला समूहलाई सहमतिमा ल्याउने प्रतिबद्धता सभापति देउवाले व्यक्त गरेका छन्।
आइतबारको बैठकमा पौडेल र सिटौला समूहका केन्द्रीय सदस्यहरु उपस्थित भएनन्।

आइतबार साँझ वा सोमबार बिहान पुनः असन्तुष्टहरुसँग छलफल गरी सोमबार दिउँसो १ बजे केन्द्रीय समिति बैठक बस्ने यादवले बताए।