मकवानपुरमा टाटासुमो दुर्घटना, ३ जनाको मृत्यु

काठमाडौं - मकवानपुरको भीमफेदीमा टाटासुमो दुर्घटना हुँदा ३ जनाको मृत्यु भएको छ। सर्लाहीबाट काठमाडौं आउँदै गरेको ना १ ज ३६४० नम्बरको टाटासुमो शुक्रबार भीमफेदी ६ मा दुर्घटनामा परेको हो। दुर्घटनामा परि ८ जना घाइते भएका छन्।

दुर्घटनामा परेको जिप सडकबाट तल खसेको छ। जिल्ला प्रहरी कार्यालय मकवानपुरले दिएको जानकारी अनुसार मृत्यु हुनेमा रामेछापको रजन गाउँकी १० महिनाकी बालिका साम्राज्ञी माझी, महोत्तरी माइस्थानका वीरसिंह वाइबा र सर्लाहीका महेन्द्र सहनी रहेका छन्।

घाइते आठ जनाको हेटौंडाका विभिन्न अस्पतालमा उपचार भइरहेको छ। दुर्घटनाको कारण भने खुलिनसकेको र अनुसन्धान जारी रहेको प्रहरीले जनाएको छ।