देउवाको उद्घोष, ‘अन्तरघातीलाई कारबाही हुन्छ, कसैले रोक्दैन’

काठमाडौं- नेपाली कांग्रेसका सभापति शेरबहादुर देउवाले पार्टीभित्र अन्तरघात गर्नेलाई कारबाही गरिने बताएका छन्।

भक्तपुरमा आयोजित प्रदेश ३ स्तरीय प्रशिक्षण कार्यक्रमलाई सम्बोधन गर्दै देउवाले पार्टीभित्र अन्तरघात गर्नेलाई कसैले पनि बचाउन नसक्ने दाबी गरेका हुन् ।

‘अन्तरघातीलाई अब कारबाही हुन्छ। कस्ले रोक्दो रहेछ अब म पनि हेर्छु’ सभापति देउवाले भने,‘पार्टी हिजो किन हार्यो। के पार्टीभित्र साँचिकै एकता छ त? अब एकताको विकल्प छैन।’

अब हुने चुनावमा जसरी पनि जित्नै पर्ने देउवाले बताए। 

देउवाले भने, ‘भक्तपुरको प्रदेश सभाको चुनाव कुनै पनि हालतमा जित्नु पर्छ। यो ऐतिहासिक ठाउँ हो। यहाँ जितेर इतिहास बनाउनु पर्छ। पार्टीले जसलाई टिकट दिए पनि सबैले जिताउनु पर्छ। अन्तरघात गर्नेलाई कारबाही हुन्छ।’

कम्युनिष्ट सरकारले अधिनायकवादी शैली देखाएको आरोप लगाउँदै देउवाले त्यसविरुद्ध पनि लड्नु पर्ने बताए।

कम्युनिष्ट सरकारले सेना–प्रहरीमाथि पनि नियन्त्रण गर्न खोजेको भन्दै देउवाले आक्रोश व्यक्त गरे।