भरुवा बन्दुकसहित एक जना पक्राउ

सुर्खेत - भरुवा बन्दुकसहित सुर्खेतमा एक जना प्रक्राउ परेका छन्। जिल्ला प्रहरी कार्यालय सुर्खेतका अनुसार वीरेन्द्रनगर–२ खोलीगाउँका मायाराम पाण्डे पक्राउ परेका हुन्। पाण्डेको घरमा लुकाई राखेको अवस्थामा प्रहरीले भरुवा बन्दुक बरामत गरेको हो। पाण्डेले घरमा बन्दुक राखेको विशेष सूचनाको आधारमा प्रहरीले घरमा खानतलासी गरेको थियो।

जिल्ला प्रहरी कार्यालय सुर्खेतका प्रमुख वशन्त रजौरेका अनुसार खाटक मुनि सलले बेरेर लुकाईछिपाई राखेको अवस्थामा बन्दुक फेला परेको हो। बरामत गरिएको बन्दुक १ मिटर १९ सेमी लम्बाई रहेको प्रहरीले जनाएको छ। बन्दुकसहित पाण्डेलाई नियन्त्रणमा लिएर आवश्यक अनुसन्धान गरिरहेको प्रहरीले जनाएको छ।

सरकारले विप्लव माओवादीलाई प्रतिबन्ध लगाएसँगै प्रहरीले अबैध रुपमा राखिएका हातहतियारको खानतलासी तिब्र पारेको छ। गाउँमा राखिएका साना हतियारनै सुरक्षाको मुख्य चुनौती रहेको भन्दै प्रहरीले सार्वजनिक सूचना जारी गरेर हतियार बुझाउन अनुरोध गरेको छ। प्रहरीले लाइसेन्स लिएर राखिएका हतियारसमेत नविकरण गरेर तत्काल प्रहरीलाई बुझाउन आव्हान गर्दै आएको छ। घरमा राखिएका हतियार स–सम्मान बुझाए स्वागत गर्ने तर अटेर गर्नेबिरुद्ध कारबाही थाल्ने प्रहरीको भनाई छ। सुर्खेतमा झण्डै दर्जनबढीले हातहतियार राख्नका लागि लाइसेन्स लिएका छन्। तर, कतिपयले भने नविकरण नै नगरेको प्रहरीले जानकारी दिएको छ।