राजपाको अवरोधपछि संसद बैठक स्थगित

काठमाडौं - राष्ट्रिय जनता पार्टीको अवरोधका कारण बुधबार बसेको प्रतिनिधि सभा बैठक स्थगित भएको छ। बैठक सुरु हुने वित्तिकै राजपाका सांसदहरुले विरोध जनाएपछि बैठक अघि बढ्न सकेन। 

बैठक सञ्चालनमा अवरोध गर्नुअघि बोल्दै राजपाका नेता राजकिशोर यादवले मधेश र थरुहट आन्दोलनका घटनाका सम्बन्धमा सर्वाेच्च अदालतका पूर्वन्यायाधीश गिरीशचन्द्र लालको अध्यक्षतामा गठित आयोगको प्रतिवेदनका सन्दर्भमा अघिल्लो बैठकमा गृहमन्त्रीबाट आएको जवाफ चित्तबुझ्दो नभएको जनाउँदै उक्त प्रतिवेदन सार्वजनिक नभएसम्म सदन सञ्चालन हुन नदिइने घोषणा गरे।

राज्यको चरित्र र सरकारको कामकारबाही उदाङ्ग हुने डरले प्रतिवेदन सार्वजनिक नगरिएको आरोप लगाउँदै नेता यादवले थारु र मधेस आन्दोलनलाई बदनाम गराउने र भ्रम छर्ने काम भएको आरोप लगाए।

यादवको भाषणपछि सभामुख महराले राजपाका सांसदहरुलाई बस्न अनुरोध गरेपनि उनीहरुले उठेर विरोध जनाइरहेपछि बैठक १० मिनेटको लागि स्थगित गरिएको हाे।