श्रमिकको न्यूनतम पारिश्रमिक वृद्धिसम्बन्धी सूचना राजपत्रमा प्रकाशित, साउन १ गतेदेखि लागू

मुख्य समाचार

गृहपृष्ठ
मुख्य समाचार

श्रमिकको न्यूनतम पारिश्रमिक वृद्धिसम्बन्धी सूचना राजपत्रमा प्रकाशित, साउन १ गतेदेखि लागू

क्यापिटल नेपालसोमबार, वैशाख २०, २०७८

काठमाडौं । यही साउन १ गतेदेखि लागू हुने गरी सरकारले श्रमिकहरूको न्यूनतम पारिश्रमिक मासिक १५ हजार रूपैयाँ तोकेको छ।

सरकारले सोमबार राजपत्रमा सूचना प्रकाशित गर्दै चिया बगान बाहेकका श्रमिकहरूको न्यूनतम पारिश्रमिक मासिक १५ हजार रूपैयाँ तोकेको हो। जसअनुसार श्रमिकको आधारभूत पारिश्रमिक मासिक ९ हजार ३ सय ८५ रूपैयाँ छ भने महँगी भत्ता ५ हजार ६ सय १५ गरी जम्मा १५ हजार रूपैयाँ कायम गरिएको छ।

यसअघि श्रमिकको आधारभूत पारिश्रमिक १३ हजार ४ सय ५० रुपैयाँ थियो ।

मन्त्रालयले दैनिक आधारभूत पारिश्रमिक ३ सय ६१ रुपैयाँ र दैनिक महँगी भत्ता २ सय १६ गरी दैनिक ५ सय ७७ रुपैयाँ तथा प्रतिघण्टा आधारभूत पारिश्रमिक ४८ र महँगी भत्ता २९ गरी प्रतिघण्टा ७७ रुपैयाँ तोकेको छ । यो चिया बगानमा काम गर्ने श्रमिकबाहेकको हो ।

उक्त पारिश्रमिकको अतिरिक्त श्रम ऐन, २०७४, योगदानमा आधारित सामाजिक सुरक्षा ऐन, २०७४ र प्रचलित कानुनबमोजिम श्रमिकले पाउने सञ्चयकोष र उपदानलगायत सुविधा रोजगारदाताले प्रदान गर्नुपर्ने मन्त्रालयका सचिव सूर्यप्रसाद गौतमले जानकारी दिए।

सरकारले तोकेको न्यूनतम पारिश्रमिकभन्दा कम पारिश्रमिक लिनेदिने गरी कुनै रोजगार सम्झौता गर्न नपाइने पनि मन्त्रालयले स्पष्ट पारेको छ । सरकारले एकपक्षीय रुपमा न्यूनतम पारिश्रमिक तोकेको जनाउँदै श्रमिक र रोजगारदाता दुवैले असन्तुष्टि जनाएका छन् । श्रम ऐन, २०७४ मा प्रत्येक दुई/दुई वर्षमा न्यूनतम पारिश्रमिक पुनरावलोकन हुने प्रावधान छ ।

प्रकाशित मिति: सोमबार, वैशाख २०, २०७८ २३:११

प्रतिक्रिया दिनुहोस्