निर्दयी असिना- जसले सखाप बनायो किसानको सपना

वर्षै र भरी मिहेनत गर्छौ बगाउँछौँ पसिना ।                                          
भित्र्याउने बेला के गर्नु हजुर लैजान्छ असिना ।।                                                

अछामको रामारोशन गाउपालिका-५ का काली बहादुर बुढाले फेसबुक लेखेको यो दुई लाईन गीतले किसानको पीडा झल्काउँछ । बर्ष भरी मिहेनत गरेर बाली भित्रयाउने बेला असिनाले सखाप बनाइदिने गरेको छ । जसले किसानका सपनाहरु सखाप बनाउने गरेको छ । 

यो एक दुईबर्षको मात्र हैन हरेक वर्ष दोहोरिरहने पीडा हो । पसाउँन लागेको गहुँबाली, पाक्नै तालेख तोरी अनि तरकारी बाली असिनाले चुटे पछि सुदूरपश्चिमका किसान दुखि बनेका छन् । यो बर्ष अछाममा मात्रै हैन सुदूरपश्चिमका प्राय सबै पहाडी जिल्ला तथा तराईका कैलाली र कंचनपुरका केही भूभागमा पटक पटक अनिसा परेको छ । 

माघ र फागुन दुई महिनामा पटक पटक परेको असिनाले अन्नबाली चुटेर सखापै पारेको कालीबहादुरले बताए । पछिल्लो पटक मंगलबार परेको असिनाले अन्नबाली, तरकारी बाली र फलफुलमा बढी क्षति पर्याएको उनले जानकारी दिए । अछामकै मेल्लेख गाउँपालिका–१ ऋषीदहका किसान अम्रिता धामीले पसाउँन लागेको गहुँ र तोरी असिनाले चुटेर सखाप पारेको सुनाईन् । 

बाली राम्रोसंग नउम्रिदै बदेलले खान थाल्ने समस्या त छदैछ त्यसैमा बाँकि रहेको पनि असिनाले चुटेर लिने गरेको उनले बताईन् । किसानले एक त भनेको बेला बीउ मल पाउदैनन् भने सिचाईको समस्या पनि त्यति नै हुन्छ । 

यति समस्याका बाबजुत पनि मुस्किलले जोगाएको बाली पाक्नै लाग्दा असिनाले लग्दा खेती लगाउनु भन्दा नलगाउनै बेस रहेको किसान बालिका रोकाया बताउछन् । प्राकृतिक बिपती, बीउ मल सिचाईको अभाव तथा जंगली जनावर बदेलको बिगबिगिले गर्दा पहाडी भूभागमा जमिन बाझै रहने क्रम बढेको छ ।