पोस्टमार्टममा ढिलाइ, श्रद्धाञ्जलि शुक्रबार विहान

काठमाडौं – दिवंगत पर्यटनमन्त्री रवीन्द्र अधिकारीलगायतको शव भोलि बिहानमात्र अन्तिम श्रद्धाञ्जलिका लागि टुँडिखेलमा राखिने भएको छ। पोस्टमार्टम गर्न समय लाग्ने भएपछि श्रद्धाञ्जलिको समय भोलि बिहानका लागि सारिएको नेकपाका केन्द्रीय सदस्य विष्णु रिजालले जानकारी दिए। अधिकारीलगायतको शव बिहान ८ देखि १० बजेसम्म टुँडिखेलमा राखिनेछ। अहिले मृतक सातैजनाको शवको त्रिवि शिक्षण अस्पताल महाराजगन्जमा पोस्टमार्टमा भइरहेको छ।

अधिकारीलगायतलाई श्रद्धाञ्जली दिन राष्ट्रपति विद्यादेवी भण्डारी टुँडिखेल जाने कार्यक्रम छ। उनले टुँडिखेलमा गएर श्रद्धाञ्जलि दिने नेता रिजालले बताए। त्यसैगरी अधिकारीप्रति श्रद्धाञ्जली दिन प्रधानमन्त्री एवम् नेकपा अध्यक्ष केपी शर्मा ओली, नेकपाका अध्यक्ष प्रचण्डलगायत विभिन्न पार्टीका नेताकार्यकर्ता खुलामञ्चमा जम्मा हुने कार्यक्रम छ।

काठमाडौंबाट तेह्रथुमको चुहानडाँडामा विमानस्थलको सम्भाव्यता अध्ययनका लागि मन्त्री अधिकारीसहितको टोली कार्यक्रम सकेर पाथीभरा हुँदै काठमाडौं फर्किने क्रममा बुधबार ताप्लेजुङको दारेभीरमा हेलिकप्टर दुर्घटनामा परेको थियो।

दुर्घटनामा मन्त्री अधिकारी, यती एयरलाइन्सका प्रबन्ध निर्देशक आङछिरिङ शेर्पा, नेपाल नागरिक उड्डयन प्राधिकरणका उपमहानिर्देशक वीरेन्द्रप्रसाद श्रेष्ठ र निर्देशक धु्रव भोछिभोया, प्रधानमन्त्री तथा मन्त्रिपरिषद् कार्यालयका उपसचिव युवराज दाहाल, हेलिकप्टरका क्याप्टेन प्रभाकर केसी र मन्त्री अधिकारीका सुरक्षाकर्मी अर्जुनकुमार घिमिरेको निधन भएको थियो। उनीहरुको शव केही समयअघि नेपाली सेनाको हेलिकोप्टरबाट काठमाडौं ल्याइएको छ। सबै शव त्रिवि शिक्षण अस्पतालमा पोस्टमार्टम भइरहेको छ। पोस्टमार्टपछि शव खुलामञ्चलमा लगी श्रद्धाञ्जलीका लागि राखिने कार्यक्रम छ।