आजबाट सरकारी अस्पताल ठप्प, सहमति नभएसम्म नखुल्ने

काठमाडौं- समायोजन प्रक्रियामा असहमति जनाउँदै सरकारी चिकित्सकहरूले अनिश्चितकालसम्मका लागि देशभरका अस्पताल ठप्प पारेका छन् । 

सरकारले अपमानित गरिकाले समायोजन गर्न खोजेको भन्दै उनीहरुले बुधबार (आज)बाट आकस्मिकबाहेकका सबै सेवा ठप्प पारेका हुन् । समायोजनका विषयमा आफूहरूको असन्तुष्टि सम्बोधनका लागि पटकपटक आग्रह गरे पनि माग सम्बोधन नभएपछि सेवा बहिष्कार गर्न बाध्य भएको सरकारी चिकित्सक संघ गोदानका अध्यक्ष डा. दिपेन्द्र पाण्डेले जानकारी दिए ।  

चिकित्सकहरुले सरकारलाई माग सम्बोधनका लागि आइतबार ७२ घण्टे अल्टिमेटम दिएका थिए । यो अबधीमा सरकारले माग सुनुवाईका लागि चासो नदेखाएपछि सेवा बहिष्कार गरीएको चिकित्सकहरुले जनाएका छन् ।

उनीहरुले सरकारले माग सम्बोधन नगरेसम्म काममा नफर्किने र अस्पतालको आकस्मिक बाहेकका सेवा चल्न नदिने बताएका छन् । आफूहरुको माग सम्बोधन नगरे अझै प्रकृतिको आन्दोलन गर्न बाध्य हुने गोदानका अध्यक्ष डा पाण्डेले चेतावनी दिए । 

सरकारले चिकित्सकहरुलाई निजामति कर्मचारीलाई जस्तै व्यवहार गरेको भन्दै जिन्दगी अस्पतालमा सडाउने षडयन्त्र गरेको गोदानको आरोप छ । दुई दुई वर्षमा अस्पताल फेर्न पाउनु पर्ने चिकित्सकहरुको अधिकार सरकारले खोजेको उनीहरुको भनाइ छ । 

सरकारी चिकित्सक संघ नेपाल गोदानले सरकारले आफ्नो कदम नसच्याए सामुहिक राजीनामासम्मको तयारी गरिएको जनाएको छ । अध्यक्ष पाण्डेका अनुसार राजीनामाका लागि ६ सय चिकित्सकको हस्ताक्षर संकलन गरिसकिएको छ। देशभर जम्मा १४ सय सरकारी चिकित्सक छन् ।