देउवा नै महाधिवेशन हुन नदिने षड्यन्त्रमा : कोइराला

इटहरी – नेपाली कांग्रेसका प्रभावशाली नेता तथा केन्द्रीय सदस्य डा. शेखर कोइरालाले आसन्न महाधिवेशन समयमै नगर्न सभापति शेरबहादुर देउवा नै सक्रिय भएको बताएका छन्।  १४ औं महाधिवेशनलाई समयमा हुन नदिने  अढाई वर्ष लम्ब्याएर सभापति भइरहने सभापति शेरबहादुर देउवा लागेको डाक्टर कोइरालाले आरोप लगाएका छन्। कोइरालालाई आगामी नेतृत्वको बलियो  प्रत्याशिको रुपमा हेरिएको छ।

सोमबार दिउँसो विराटनगरस्थित कोइराला निवासमा सोमबार नेपाल प्रेस युनियन मोरङले आयोजना गरेको पत्रकार सम्मेलनमा कोइरालाले भने, ‘हाम्रो कार्यकाल अब एक वर्षमात्र बाँकी छ। तर, सभापति देउवा भने दुई वर्ष थप्ने दाउमा हुनुहुन्छ।’ नेपाली कांग्रेस पार्टी कोइरालाहरुको मात्रै नभएको बरु सबैको योगदान र गगत बगाइले बनेको बताउँदै डाक्टर कोइरालाले भने, ‘कांग्रेस कमजोर भएको छ।’

वहुमतले विधान पारित हुनु लोकतान्त्रिक विधि भएपनि आफू काठमाडांैमा रहेको भए ‘नोट आफ डिसेन्ट’ लेख्ने बताउँदै कोइरालाले तलबाट निर्वाचित भएर आउने प्रावधान नराखेकोमा  आपत्ति प्रकट गरे।  कोइरालाले संरक्षित कोटामा एक पटक मात्र हुनुपर्ने र अर्को पटकदेखि प्रतिस्पर्धाको आधारमा नै आउनु पर्ने व्यवस्थाको पक्षमा आफू रहेको बताए। महासमितिले दिएको ‘म्यान्डेड’ भन्दा अलग प्रस्ताव स्वीकार्य नहुने उनले बताए।

देउवाको जस्तै सरकारको आलोचना गरेका कोइरालाले सरकारका कामहरु जनविरोधि देखिएको बताए। भ्रष्टाचार बढेको, मिडिया नियन्त्रण गर्न खोजेको, नेपाली सेनाको बद्नाम गरेको र वाइड बडि प्रकरणमा मुछिएको भन्दै कोइरालाले सरकारको आलोचना गरे।