हातमुख धुन धारामा जाँदा एकाबिहानै भालुको आक्रमण

सुर्खेत- जुम्लामा भालुको आक्रमणबाट दुईजना घाइते भएका छन्। घाइते हुनेमा हेमराज रोकाया र उनकी श्रीमती निर्मला रोकाया छन्। भालुले निर्मलाको अनुहार र हेमराजको टाउको तथा ढाडमा कोतरेको छ। घाइतेको कर्णाली स्वास्थ्य विज्ञान प्रतिष्ठानमा उपचार भइरहेको छ। 

दुवैजना खतरामुक्त छन्। दैलेखका स्थायी घर भएका उनीहरु जुम्ला सदरमुकाममा मोबाइल पसल सञ्चालन गर्दै आएका छन्। हातमुख धुन धारामा गएको बेला उनीहरुलाई भालुले आक्रमण गरेको थियो। 

बिहीबार बिहानै (करिब साढे चार बजेतिर) भालुले आक्रमण गरेर घाइते बनाएको जुम्लाका डीएसपी दानबहादुर थापाले जानकारी दिए। आक्रमण गर्ने भालुको नेपाल प्रहरी, सशस्त्र प्रहरी, नेपाली सेना र स्थानीयले खोजी गरिरहेका छन्। 

‘बिहानपख भालुले आक्रमण गरेछ, तर भालु भेटिएको छैन,’ डीएसपी थापाले भने, ‘अहिले आक्रमण गर्ने भालुको खोजी गरिरहेका छौं।’ बजार क्षेत्रमै भालुले स्थानीयलाई आक्रमण गरेपछि प्रहरीले बाइकिङ गरेर सबैलाई सचेतना आह्वान गरिरहेको छ।