पञ्जावलाई पराजित गर्दै हैदराबादको पहिलो जित 

काठमाडौं- इन्डियन प्रिमियर लिग (आईपीएल)मा सनराइजर्स हैदराबादले पहिलो जित निकालेको छ। राजीव गान्धी अन्तर्राष्ट्रिय रंगशालामा सम्पन्न खेलमा  हैदराबादले आइतबार सम्पन्न आफ्नो तेस्रो खेलमा पञ्जाव किङ्सविरुद्ध आठ विकेटको जित निकालेको हो। 

पञ्जावले प्रस्तुत गरेको १४४ रनको लक्ष्य हैदराबादले १७.१ ओभरमा दुई विकेट गुमाएर पूरा गर्‍यो। टस हारेर ब्याटिङ गरेको पञ्जावले निर्धारित २० ओभरमा नौ विकेट गुमाएर १४३ रनको योगफल जोडेको थियो।

हैदराबादको जितमा राहुल त्रिपाठीले ७४ रन बनाए। कप्तान आइदेन मार्करमले ३७, मयन्क अग्रवालले २१ र ह्यारी ब्रुकले १३ रन जोडे।

पञ्जावका अर्शदीप सिंह र राहुल चहरले समान एक/एक विकेट लिए। 

त्यसअघि पञ्जावका कप्तान शिखर धवनले ९९ रन बनाएका थिए। साम करनले २२ रन बनाउनुबाहेक अन्यले दोहोरो अंकमा रन जोड्न नसक्दा पञ्जाव ठूलो योगफलसम्म पुग्न सकेको थिएन। 

हैदराबादका मयन्क मार्कन्डेले चार विकेट लिए। चार ओभर बलिङ गरेका मार्कन्डेले १५ रन खर्चिए। मार्को जन्सेन र उम्रन मलिकले समान दुई विकेट लिँदा भुवनेश्वर कुमारले एक विकेट लिए। 

जितसँगै तीन खेलबाट दुई अंक जोडेको हैदराबाद तालिकाको आठौं स्थानमा उक्लिएको छ। समान खेलबाट चार अंक जोडेको पञ्जाव तालिकाको छैटौं स्थानमा छ।